7-11 x Hello Kitty & Friends Sweet Delight 公仔 - 第二週戰績

經過各方親朋好友嘅鼎力支持之下，今個星期印花收鑊一共 53 個！比上星期又多兩個喇！

依家一共有 104 個印花喺手，睇嚟我都係時候去換下公仔先得嘞...

7-11 x Hello Kitty & Friends Sweet Delight 主題店

記得當 7-11 換 Sanrio Crystal Charms 時，比我無意中發現咗一間 7-11 主題店；兩年後嘅今日，梗係要舊地重遊，睇下佢地今次又會佈置成點啦....

果然，皇天不負有心人，不枉我山長水遠咁走到去呢間 7-11 主題店，今次呢間 7-11 同上次一樣，周圍都貼滿今期 Sweet Delight 系列嘅公仔，離遠已經望到，真係好靚、好得意...

由於呢間 7-11 位處於轉角位，所以有兩邊門口，亦都係因為咁，就可以有兩大幅玻璃牆可以佈置...

其中一邊玻璃牆


 
zoom 近咗嘅 Pekkle...

 

另外一邊玻璃牆


 


店內設計 - 其中一個門口貨架位置嘅牆身 

zoom 近 d Pekkle 先，係第二期換購嘅＂朱古力 Pekkle＂呀...


 


通往員工休息室 / 貨倉嘅門口...


 


仲有唔少得嘅就係＂立食區＂喇！ 


 


＂立食區＂嘅另外一邊... 

仲有就係每一間 7-11 都唔少得嘅 -

全 set 公仔嘅 display 櫃


 


偏心 d，仍然只係 zoom 近咗 Pekkle 嘅公仔... 


 


Sweet Delight 公仔卡紙，當然亦都只係影咗 Pekkle 喇，其實所有公仔都有自己嘅卡紙嫁！ 

最後就係『貨品宣傳 banner』，呢樣嘢並唔係間間 7-11 都有，多數都係掛咗 Hello Kitty、My Melody 嘅款式出嚟，我都係搵咗好多間 7-11 先『有幸』見到咋，而呢張亦都唔係喺呢間主題店度影，而係喺另外一間 7-11 發現嫁！ 

當然又要 zoom 近 d 喇... 不過都唔係太清楚，因為張 banner 係掛咗喺天花位置，好難先可以唔比店員發覺，而又影得到佢囉... 


 

7-11 x Hello Kitty & Friends Sweet Delight 公仔 - 首週戰績

11/12/2012〔星期二〕，7-11 x  Hello Kitty & Friends Sweet Delight 公仔換購活動開始咗剛剛一星期，喺呢個星期，幸得屋企人鼎力支持，埋單計數我一共儲到 51 個印花，仲盤算緊究竟用咩方法去換先係最有效、『中獎』機會最高...

上次換 charms 時印花嘅款式只有八種，而今次就有十二款唔同嘅公仔，搞到我好難先可以拎到 Pekkle 嘅印花，而且我覺得無論係個印花定係張印花卡，個設計都係上次靚過今次囉。

由於印花款式多咗，所以喺 51 個印花入面，好辛苦先可以有 5 個係 Ahiru No Pekkle，我唸住好似上次換 charms 一樣，儲起哂 Pekkle 嘅印花，留到最後先會用嚟換公仔...

仲好記得上次換 charms 時，當我拎住幾張貼滿哂 Pekkle 嘅印花卡去到 7-11 時，個店員打量咗我好幾次，又反覆咁睇咗張印花卡好幾次，把口就係度『喃喃自語』：都未見過有印花卡貼哂同一款公仔.... 跟住先肯幫我換 charms，慌死我係用假印花去呃佢一樣... 

7-11 x Hello Kitty & Friends Sweet Delight 花車巡遊 @ 尖沙咀海防道

過去嘅週末，滿以為就係 7-11 x Hello Kitty & Friends Sweet Delight 花車巡遊『出車』嘅頭炮，因為之前睇網頁、雜誌介紹，都話架宣傳車係逢星期六、日，於全港各區行走，仲話宣傳車嘅行程要留意 7-11 嘅 facebook。點知上星期五晚去到 7-11 嘅 facebook，唸住 check 下佢地架宣傳車第一站嘅行程，先發現當晚架宣傳車已經喺銅鑼灣 Sogo、世貿一帶，展開咗宣傳嘅第一站！！

一心唸住可以『先睹為快』，結果唯有要留番第二日先再去做『追車族』啦...

整架宣傳車，裡裡外外搵勻哂，唔計 display 嘅公仔，就只可以搵到唯一一個 Pekkle 係車身，仲要貼正喺架車類似太平門嘅位置，結果就梗係搞到 Pekkle 杯啫喱冇咗一忽，變得唔完美囉！

宣傳車內擺放咗一個大嘅玻璃飾櫃，對街嘅一面係放咗第一期換購嘅十二款公仔。



 

而向車廂嘅一面，就係擺放咗第二期換購嘅公仔...

第一期換購公仔： Pekkle 啫喱

由於 Pekkle 擺放咗喺最側邊嘅下層位置，可憐嘅 Pekkle 比盞好強勁嘅射燈照住，我用嘅只係一部好 low-end 嘅『傻瓜機』，當我用 auto mode 時，因為街上唔夠光，但係射燈又太強，flash 就唔會閃，結果六隻 Pekkle 影出嚟就『黑忟忟』；但當用 flash forced on 嘅 mode，就會有 over 同埋反光嘅情況，兩害取其輕，結果就用咗有鎂光燈呢張。如果可以將 Pekkle 放喺中間位置嘅話，咁影出嚟嘅效果應該會靚好多囉！





第二期換購公仔： Pekkle 朱古力

第二期嘅公仔就將 Pekkle 擺咗喺上格，不過都係最側邊嘅，又係用盞強勁嘅射燈照住咗 Pekkle，好彩嘅係車廂內有燈光，所以就算用咗鎂光燈，影出嚟 Pekkle 塊面係雖然都係有反光同埋有陰影嘅問題... 不過都總比向街一面嘅公仔影出嚟效果好少少...
  




放喺街上嘅 Hello Kitty 紙版公仔...

放喺車廂內嘅  XO 紙版公仔。雖然我唔鍾意 XO，不過平心而論，我覺得呢個紙版 XO 靚過紙版 Hello Kitty 多多聲喎...

車廂內嘅擺設

 

 

講真，如果係 Pekkle fans 嘅話，其實係唔須要對呢架宣傳車存有任何『幻想』，因為真係冇乜 Pekkle 可以影。不過如果『奢望』可以拎到 Pekkle 貼紙嘅話，我都仍然願意做『追車族』... 最衰在場三位工作人員問乜都唔知，所以我根本都唔知遲 d 會唔會有印咗 Pekkle 公仔嘅貼紙免費派發，所以我先話係『奢望』....

總之上星期六，在場嘅工作人員就話當日只會有 My Melody 同大口仔兩款公仔嘅貼紙派囉。