Pekkle 索袋

之前都提過，但凡 d 唔會太阻地方，又比較實用既精品，如果個設計唔係太差既話，我都會買既。不過呢個索袋都出左一段時間，終於都拖係拖到上個星期先決定買

對於我黎講，呢個索袋既設計唔單只唔算〝唔係太差〞，仲幾靚添... 至於令到我遲遲都未買既原因，其實係因為個價錢。呢個 Manis 出既索袋 size，與 Gift Gate 出既大索袋 size 係差不多一樣，但係呢個袋就要成 $30，Gift Gate 既大索袋只係十七、八蚊。相差左四成，一路都未買，就係唸緊究竟呢個袋貴左係邊度？

買左番黎，越睇越覺得好熟口面，原來呢個索袋係沿用 2010 年既『Postage Pekkle』既設計，令我更加唔明白點解舊既設計仲賣得咁貴... 唸下唸下，突然間記起今年 Manis 既 catalogue 都有一款 tote bag 既設計同呢款好相似，但係寫明係手挽袋喎，點會變左索袋...

半信半疑之下，拆開個包裝睇下，原來真係所謂既 tote bag！咁細個 tote bag 真係比較少見，多左嗰四成價錢，其實就係因為多左個手挽位...

呢個設計我係覺得幾靚既，不過純粹多左個手挽位就比普通既索袋貴左四成價錢，又好似唔係幾值咁... 再者，係一個咁細既索袋上加一對手挽，係唔係有 d 『畫蛇添足』既感覺呢？

Pekkle 証件套連頸繩

又出新款既証件套連頸繩喇！唔知 licensees 係唔係當左我地個個都有九條頸既呢？因為差不多每個 licensee 每一季都會幫每一款公仔出一至兩款証件套連頸繩，我唸就算每日都玩碌地沙既小朋友，都無可能換款換得咁密囉...  不過話雖如此，我都係忍唔住買左...

依然係我最唔鍾意既〝變型 Pekkle〞，咁點解我仲買呢？

原因係〔一〕呢隻粉藍色好 soft，令人一眼望埋去就有種好舒服既感覺。〔二〕個人覺得，証件套既手工做得相當好，d 線位唔會車到歪歪斜斜咁，連 Pekkle 對眼同個口都係用線車上去，雖然我唔識呢門手藝，不過睇起上黎似乎算係多手工既製品。

証件套背面既車工，睇落都一樣唔〝馬虎〞嫁！

而頸繩都印左好多個大頭 Pekkle，如果個鴨咀既橙色再淺番 d 就更加順眼喇！

不過整體黎講，我覺得呢個証件套既設計同手工都做得幾唔錯，起碼並非一般既〝行貨〞囉！

Pekkle Boxer

幾個月前，Sanrio Kiosk 推出左 Pekkle 一套兩件裝既內褲，最近佢地又幫 Pekkle 推出左同 pattern 既 boxer...  

兩隻顏色各買一條，純粹收藏...

Pekkle passport holder

好靚仔既 Pekkle passport holder，個設計概念同之前既 A4 plastic folder相類似，不過都好正！！

戴住帽、孭住背囊... 一副整裝待發既模樣！

又意大利、又法國... 好開心咁喎！一隻由南半球澳洲而黎既鴨仔 Pekkle，準備向北半球進發！！

封套有 Pekkle 大頭既剪影，加上我最愛既藍色.... 好靚！ 至於質地方面，就採用左之前推出既八達通卡套既質料，一樣係軟身膠、有閃粉既效果。

內頁，已經預留位置可以放 SIM card、SD card 同埋身份証、信用卡等等... 都好實用！

Pekkle 擦膠筆

Pekkle 首次推出既擦膠筆。最鍾意就係買有實用性既精品，感覺上冇咁浪費、好似抵 d 咁...

Pekkle 既造型都係一般〝招牌貨〞，不過因為實用既關係，一口氣就買左三支〔亦都可能係要〝彌補〞番我買唔到原子筆既〝傷痛〞〕！