Sanrio 50th 週年美版日貨 Mini Tote Bag〔二〕

早個零月係征服買左個 Sanrio 50th 週年美版日貨 Mini Tote Bag ，當時個價都唔平，小小一個手抽袋，索價近三百大元！不過當時見個袋既 Pekkle 造型幾特別，深藍色又係我喜歡既顏色，所以唸左好耐之後，結果都係買左落黎....

點知事隔不到一個月，竟然比我發現 Gift Gate 都有入到呢批貨，雖然時間上就比征服世界遲左好多，不過價錢亦差左一半有多，值得等耐 d 囉！當時仲唸緊好唔好買多個當 "溝貨" 呢？結果梗係理智戰勝左啦！明知自己都唔會用，仲買多一個重覆既小袋仔仲乜呢？所以咪唯有當自己 "時運高"，睇唔到囉...

就係剛過去既星期六，我係另外一間 Gift Gate 又見到呢個 Sanrio 50th 週年美版日貨 Mini Tote Bag，不過呢個就唔同 pattern，今次係我好唔鍾意既鮮紅色，不過有 Pekkle 份，算係位處係中間位置，而左上角仲有一個我兒時〔Pekkle 仲未出世之前〕最鍾意既 Sanrio character -- Tuxedo Sam，仲要係好大個同好 sharp 添... 所以今次最終都忍唔住手，買左呢個袋仔 lu！

係 Gift Gate 買係有埋個原裝既 "磨砂" 膠袋，但係係征服世界買時，冇左呢個原裝膠袋之餘，仲要係用個封哂塵既普通膠紙袋住，番到屋企都忍唔住手要即刻換左個袋...

size 同上次果個一樣，我唸係僅僅夠放一個 600ml 左右既飯盒囉，而且今次既 "騎呢" Sanrio 公仔好似比較多，有 d 公仔唔好話佢個名，係連個樣都未見過添嫁！

而背面就同之前深藍色果個係一模一樣既！

重要消息 -- Pekkle 雪絨毛印花毛氈

一年兩度既『一田購物優惠日』將於 5 月 26 日至 5 月 30 日舉行。一如以往，未開始已經有排山倒海既宣傳攻勢，我咁近 "城隍廟"，當然都唔會執輸，一早就要睇定份宣傳單張，睇下有咩野買啦！

唔睇猶自可，一睇唔得了呀！係宣傳單張上，竟然發現到 Pekkle 既蹤跡！仲要係從來都未推出過既 ---- 雪絨毛印花毛氈！平時見珊瑚絨公仔印花被就見得多，唔知同呢種雪絨毛印花毛氈有咩分別呢？好期待呀！

經典既 Pekkle 造型，仲有齊三條魚仔 friends，成張被望埋去好 sharp、好靚呀！不過一見到佢寫住 "限售 200 張" 就好擔心買唔到囉.... 大家都知每年既『一田購物優惠日』係幾咁人山人海嫁喇！呢件一年一度既 "盛事"，往往都會成為報章既 A1 頭條，或者電視節目既採訪專題，再加埋越黎越多既內地遊客，我真係驚自己到時會搶唔到囉！希望我地呢班 Pekkle fans 都可以買到啦！

唯一 "美中不足" 之處，size 只有單人，大概係 4 呎 x 6 呎。不過 $299 / 2 張，for d 已婚既 Pekkle fans 咪一人冚一張囉，都岩數呃！for 我黎講，就一張冚，一張儲，一樣岩哂喎！

記得有幾位 Pekkle fans〔當然包括我自己在內啦！〕，係年幾前都 "接觸"  過一間生產 Sanrio 公仔珊瑚絨印花被既床上用品公司 uji，想問下佢地有冇計劃會推出 Pekkle 既珊瑚絨被，記得當時佢地都只係話『冇計劃，不過都會將我既意見向公司反映』呢 d "行貨" 回應！眨下眼都過左幾年時間，唔知呢款雪絨毛印花毛氈係唔係就係佢地既出品呢？

日本 Sanrio 2011 年最受歡迎卡通人物選舉

經 blog 友 Carol 通知，新一輪 Sanrio 最受歡迎人物選舉又開始接受投票喇！Pekkle fans 識做喇！記得踴躍 d 上去 Sanrio 既網頁投票喇！

截止投票日期係 2011 年 7 月 31 日凌晨，而投票結果就會係 2011 年 9 月 10 日既草莓雜誌公佈。

呢幅圖會係你成功投票之後出現，而幅圖特別之處係當中既主角，就係上年選舉既頭十名 Sanrio characters！要令到 Pekkle 成為來年圖中既一份子，就要靠我地一班 Pekkle fans 既努力喇！

上年既選舉 Pekkle 位列十六，希望所有 Pekkle fans 今年會再接再厲，將 Pekkle 既票數推至最高，務求 Pekkle 今年可以擠身十大，成為明年『海報中既主角』啦！！

你今日投左未呀？

Pekkle 速遞員造型告示貼

超愛呢款 Pekkle post-it，雖然好似可愛小 win win 所講，呢款 post-it 既黐力都幾弱，貼得唔係好穩陣，不過都好岩係公司用呀！Pekkle 既速遞員造型又醒目，post-it 又實用，依家已經擺左一架 "雞記車" 係公司檯面日對夜對，望住架 "車仔" 做野都會開心 d！

睇下 "Pekkle 速遞" 呢架公司車幾型！仲要係自訂車牌 "AP 1990"... 簡直就係 Pekkle 既專用 "戰車"！！

呢個魚仔司機真係唔負責任，雖然 Pekkle 係度落緊貨姐，都唔洗係車上面 "恰眼瞓" 呀？佢應該要好似其他魚仔咁，幫 Pekkle 手送貨先得嘛，真係唔岩！

藍色既 post-it... 又靚又實用！呢件新產品真係好正！！

Pekkle & Ruby 情侶檔單行簿

等左好耐 Gift Gate 都仲未番齊貨〔其實自己太懶，都係去經常去嗰一、兩間 Gift Gate check 貨 〕，結果都等唔切，只得大 size 都買住先！

好難得 Pekkle 會同女友仔 Ruby 一齊出場！仲要一齊做家務，超 sweet 呀！

睇下魚仔幾咁百厭，Pekkle 同 Ruby 咁辛苦係度做家務，佢就匿埋係 Pekkle 件衫既帽入面！

內頁既 Pekkle 依然係好忙碌咁係度拖緊地.... 可惜冇 Ruby 份啦~

 

後記〔更新於 5 月 22 日〕

終於都買到細 size 既 Pekkle 同 Ruby 單行簿喇！原來無論係封面或內頁，都係同 A5 size 一樣嫁咋！之前出果本絨面單行簿三個 sizes 既封面、封底同內頁，都會有唔同既 pattern，果個系列好似有 heart d 喎！ 

封面：同大 size 一樣既！

內頁：又係同 A5 size 完全一樣既！