一田購物優惠日 2015 (21/5/2015 - 25/5/2015)

半年一度嘅一田購物優惠日又開始喇！一如以往，我梗係第一時間睇下有冇 Pekkle 先啦！搵勻全份單張，就只有一樣貨品有 Pekkle，仲要係兩年前〔2013年11月〕已經推出過咗旅行喼，好失望囉....



等我搵日收工去巡一巡，睇下有冇咩『漏網之魚』先得~

AEON 夏日大割引〔16/5/2015 - 20/5/2015〕

每年嘅五月同十一月，都係各大百貨公司做促銷嘅日子，千色店、Sogo、永安、先施、一田...等等輪住嚟減價，咁 AEON 又點會執輸呢？

睇到單張，今期促銷產品竟然有 Pekkle 新貨喎，唔買都要去捧下場啦！




其實呢 d 家居服，Pekkle 間唔中都會推出一、兩款，如果款款都買哂，就算唔破產，屋企要搵地方擺都難啦！所以我好『理智』地冇見一套、買一套嘅，就好似幾個月之前出嘅呢一款，因為覺得唔係咁特別，價錢又唔係好抵，短袖衫、短褲都要 $139 一套，所以結果我都係冇買到...



到今次促銷又推出咗另外一款，今次做特價 $100 一套，喺促銷期內仲照價有八折喎，幾十蚊一套衫，唔買又好似對唔住 Pekkle 咁，所以結果就帶咗佢番屋企喇！

日本手信

都已經打定輸數，喺日本應該都唔會買到咩 Pekkle 產品，全賴我家人幫我細心搜羅，咁都比佢地發現到兩款 Pekkle 產品，雖然兩款精品都係什錦公仔款式，不過我都已經好滿足嫁喇！

第一款係用嚟儲存草莓雜誌嘅 binder，我唸大家都略略估到呢個 binder 會有幾大個啦！家人話係『月下貨』，所以賣得好平嫁咋....




zoom 近 d Pekkle 比大家睇下先，就係之前出過嘅啤牌造型 Pekkle 呀！



第二樣 Pekkle 手信，就係 mt crossover Sanrio 嘅 masking tape，2014 年嘅出品，最重要係原裝 Made in Japan 嫁！好難得呀！因為只係得一卷嘅關係，唔捨得拆開。唔知喺呢 10m 長度嘅 masking tape 入面，Pekkle 一共出現咗幾次呢？又唔知呢卷 masking tape 係咩質地嘅呢？係紙造？定係膠呢？

 

 

 

Pekkle 好似張郵票咁，仲要有埋郵戳，好認真喎...

草莓雜誌 - 2015 年 5 月號

去得日本，梗係唔會只係買兩本草莓雜誌番嚟咁少啦，我仲托家人睇埋最新一期嘅 5 月號添...




今期唔係咩週年紀念刊，所以贈品嘅款式都即刻變番『正常』，只有五款，今次送嘅係迷你嘅信紙、信封套裝，好好彩其中一款都係有 Pekkle 份.... 



雖然只係什錦公仔款式，不過因為運用嘅顏色好柔和，望落去感覺好舒服，好精緻呀~ 



睇下呢個柔和嘅 BB 造型 Pekkle 幾得意~
  

草莓雜誌 - 2015 年 4 月號

呢期四十週年做封面嘅 4 月號草莓雜誌極之搶手，如果之前冇一早預定嘅話，根本係買唔到現貨，因為 3 月 11、12 號打去征服世界問貨時，店員已表明如果冇預先訂貨嘅就已經冇貨可賣。好彩家人 4 月中去咗一次日本，即刻托佢搵下 Gift Gate 仲有冇賣剩嘅存貨啦，好彩咁都比我家人搵到，買咗番嚟比我！






呢期紀念呢期四十週嘅封面，都有幸見到 Pekkle 呀！



可能因為係紀念四十週年嘅關係，今期連贈品都多款式過平時，一共有十款唔同款式嘅 A4 plastic folder，我梗係只會買有 Pekkle 份嘅款式啦！



第一款〔正面〕



第一款〔近鏡〕



第二款〔正面〕



第二款〔背面〕



第二款〔近鏡〕，因為呢款 folder 係以不同期數嘅草莓雜誌封面為主題，所以有多款 Pekkle『出鏡』嫁，正！