Phantom Pekkle's Blog

Thursday, June 5, 2014

2014 年日本 Sanrio 最受歡迎卡通人物選舉系列精品 - Memo pad

另外一款同系列嘅精品就係 memo pad，呢款 memo pad 都設計得好細心同精緻。就咁睇起上嚟，雖然只係窄窄長長嘅一張便條紙，但係當你將其中一格嘅便條紙撕出用嚟時，就會發覺張窄窄長長嘅便條紙，其實係可以摺疊成一個封套，咁便條紙上嘅內容就唔怕外洩啦！^_^

全本 Memo pad 一共有 100 名卡通人物〔正正就係全部嘅『候選佳麗』〕，每款卡通人物都會有五張同款嘅便條紙，即係每本 memo pad 共有 500 張便條紙，都幾抵嫁喎。

封面塊膠片上，都印咗 Pekkle 係上面嫁！

內頁嘅 Pekkle 便條紙係用咗我最愛嘅藍色。四色印刷呢邊就係用嚟寫內容嘅...

而單色呢邊就便條嘅封面，最下面大魚仔嘅位置就係用嚟寫名，而上面印咗 Pekkle 嘅位置係有個開口位，只要將張便條紙沿住線位對摺，就啱啱好可以攝入 Pekkle 位置下嘅開口位，形成一個小封套嘅模樣。好有心思，抵讚！

Memo pad 嘅底部印有『使用說明』，教埋你點樣將一張便條紙摺成一個封套嘅模樣，圖文並茂，唔洗驚唔識用啦！

呢款 memo pad 亦都係原裝日本貨，唔怪之得咁精緻又實用啦！唯一美中不足之處，就係佢地可能係用咗環保紙之類嘅紙張，所以喺顏色印刷方面，就冇咁鮮明、光亮囉！

2014 年日本 Sanrio 最受歡迎卡通人物選舉系列精品 - 貼紙

第二款登場嘅 2014 年日本 Sanrio 最受歡迎卡通人物選舉系列精品就係貼紙。

舊年都有推出過貼紙，不過上年係『海棉貼紙』，今年就係紙嘅。不過今年款貼紙嘅特別之處，就係一套有兩張唔同款嘅貼紙，感覺好抵呀！

睇起上嚟係唔係有 D 眼花撩亂呢？因為係有兩款唔同嘅貼紙，而面嗰張貼紙係透明膠嘅關係，令到底部張貼紙都反映到出嚟，所以就咁 "花碌碌" 囉...

包裝紙嘅底部，同上年款貼紙一樣，都係印哂相關企位卡通人物嘅名稱出嚟。

封面嗰張貼紙嘅 Pekkle，係著粉紅色衫，舉高手嘅造型。

而底部嗰張貼紙嘅 Pekkle，就係著粉藍色衫，大踏步嘅造型。

呢張貼紙係正宗日本製，好難得呀！

2014 年日本 Sanrio 最受歡迎卡通人物選舉系列精品 - 萬字夾

每年嘅 Sanrio 最受歡迎卡通人物選舉，就係 Sanrio 搵錢既大日子！因為近呢幾年，Sanrio 都會趁住呢個選舉，推出一系列嘅精品，今年都唔例外。

首先出場嘅係萬字夾。

每套合共有十二個大、二十三個細嘅萬字夾，每個萬字夾都用咗唔同嘅卡通人物，我估計 Sanrio 都係以舊年選舉結果去釐訂邊位卡通人物有份，同埋相關萬字夾嘅大細，所以如果去年 Pekkle 可以進入頭十名位置嘅話，咁佢就好大機會係屬於大萬字夾嘅一份子啦！不過咁，有份就點都好過冇份，所以都好滿足嫁喇！^_^

雖然係日本 Sanrio 嘅正牌貨，不過個萬字夾始終都係中國製造嘅，所以喺質素方面，都不能要求太高嫁喇~

Friday, May 30, 2014

日本 Sanrio 2014 年最受歡迎卡通人物選舉 (Sanrio Character Ranking 2014) - 中期報告 << 選情告急！！>>

今朝如常上 Sanrio 官網投票時，無意之中發現日本版官網〔平時我係直接到英文版投票〕，發表咗卡通人物選擇嘅中期報告。Pekkle 嘅成績強差人意呀！唔只達唔到進入第二輪選擇嘅資格〔即係要喺所屬組別爭取到頭四名嘅位置〕，Pekkle 依家就連五甲都不入呀！ =(

要 Pekkle 輸比 Kerokerokeroppi，又或者係 XO，我都心甘命抵，但係其餘三位卡通人物，我真係唸唔到佢地有幾紅囉？竟然咁都可以入到五強？！好失望呀！

喺呢度，我呼籲所有 Pekkle fans，要好好利用餘下嘅十幾日時間，投多幾票比 Pekkle 呀！

你的一票，十分重要！Pekkle 可唔可以擠身頭二十名之內，晉身下一輪投票，就要靠你神聖嘅一票喇！

你今日投咗未呀？