草莓雜誌 - 2012 年 12 月號

10/11 就已經上網睇下今期草莓雜誌贈品係 d 乜，由於唔識睇日文嘅關係，一見到有 Pekkle 份，就有理冇理打電話去征服留貨先啦.... 

一路都估緊今期送嘅禮物究竟係 d 乜，等左幾日，終於都有貨到手，原來係一張 A3 size 嘅貼紙... 雖然係求其咗 d、唔夠精美，不過難得有 Pekkle 份都算數啦...





Pekkle 唔夠 Hello Kitty、Little Twin Stars、My Melody 呢 d 主角人氣盛，當然係冇可能自己一個霸哂成張 A3 size 嘅貼紙啦！不過『大雜會』之中，Pekkle 都有一張『單人相』同『大合照』嘅，算叫做有交代啦...

『單人相』

『大合照』

循例又要搵下成本草莓雜誌有咩地方會提到 Pekkle 啦！好可惜係冇嘅，只係有 d 以『路人甲』身份出現嘅情況...

2012 Sanrio Thanks Party，廣告一則，只有 Pekkle 嘅背部...



仲要企到去最低既位置...



Saniro 最新嘅 iPhone 5 case，當然冇 Pekkle 獨個兒嘅機套喇！只有兩款『大雜會』嘅機套，Pekkle 先可以叼下光...



第一款



呢款仲要係限量特別版，Pekkle 細到差 d 走漏眼...



最後一個出現 Pekkle 出現嘅地方係雜誌內其中一個叫 Strawberry Comics 嘅專欄...



好難得嘅 "手繪" Pekkle 喎，唔知係唔係原作者嘅 "手稿" 嚟呢.... 定其實都只係 CG？

2012 年一田購物優惠日

每半年一次嘅一田購物優惠日又嚟喇！今次舉行嘅日期係 22/11/2012〔星期四〕至 26/11/2012〔星期一〕。

每一次一田購物優惠日，我最關心嘅，當然係睇下有咩 Pekkle 產品會做傾銷啦！睇完份宣傳單張之後，係有 d 失望，因為今次只得兩款 Pekkle 嘅 products 會做傾銷，其中一款就係同 5 月份嗰次一樣嘅產品 --- Pekkle 四轆旅行喼。今次係限售 100 個，價錢同上次一樣，不過數量就比上次多咗一倍，唔知今次仲會唔會好似上次咁，係 lunch 之前就已經賣哂呢？

而另外一樣 Pekkle 貨品就係同 2011 年嗰次嘅精選貨品同類型，只係唔同款式 --- Pekkle 雪狐絨床品套裝。熟悉 Pekkle 嘅人應該都知道，呢個 pattern 係 Pekkle 最 classic 嘅造型，所以當我睇到宣傳單張嗰一刻，都真係有少少心動想買，不過冷靜 d 去唸，舊年買嗰套 Pekkle 雪狐絨床品，其實都只係用咗一個月左右，就已經唔再須要用〔因為都真係幾暖〕，所以套床品都仲係好新淨，再加上我仲有單獨嘅 Pekkle 雪狐絨被，如果再買多一套嘅話，唔單只冇機會用，其實係連搵地方存放都成問題，因為呢套床品都幾厚身，就算包好一套，都係相當大件嫁..

不過咁，我以用家嘅身份去同大家講，呢套床品真係又軟又暖，質地好好。所以如果大家唔會對毛毛有敏感嘅話，呢套床品都幾值得大家去選購！

唔好比張宣傳單張誤導，根據過往經驗所得，床品嘅 size 其實係由單人至加大都齊尺碼，所以要買雙人 size 都冇問題嫁！

Pekkle 日版船襪

記得係九月號嘅草莓雜誌中，已經見到 Sanrio promote 將會推出一系列卡通人物嘅船襪，Pekkle 有幸都係其中之一。當時我已經講，希望征服世界會入貨，咁我就唔洗托人幫我去日本買啦！皇天不負有心人，果然比我喺征服世界發現到 Pekkle 船襪嘅蹤跡，價錢又唔貴，試問又點可以忍得手呢？

見到肥嘟嘟嘅 Pekkle 已經好開心，加上粉藍色嘅襪，更加令我愛不釋手...

腳底位置印有 Pekkle 嘅全名，冇串錯字嫁...

zoom 近 d 比大家睇清楚 Pekkle 嘅全名，2012 年全新貨品！

日本貨即係日本貨，連 product tag 都靚過人，正~

雖然係強國製造，不過寫明 "For sale in Japan only"，今次真係要 "多謝" 征服世界入貨，我先可以咁方便喺香港都買得到！

船襪單價標明係連稅 399 日元，但係估唔到坐完飛機嚟到香港，單價係仲平過喺日本買喎... 又再一次要 "多謝" 征服先得嘞，相信因為係佢地訂單數量大，以批發價入貨，所以先可以喺香港賣得仲平過喺日本囉！

Pekkle 眼鏡布

最新一款眼鏡布，pattern 係用番之前出過好多唔同精品嘅『夾公仔機』系列...

冇視力問題、唔須要戴眼鏡，全屋亦只有唯一一副因為要睇 3D 電影而買嘅『眼鏡』... 但係前前後後我都已經唔記得自己究竟買左幾多塊 Pekkle 眼鏡布... 又再一次破壞左自己早前訂下『會用先買』嘅原則添...

 

冇計啦！鬼叫自己一早都已經讚過佢呢個 design 夠 colourful、又得意、有創意，難得唔係交『行貨』咩？再者，呢塊眼鏡布又唔係貴喎，仲要話係 "Made in Korea" 添，依家已經好少精品唔再係強國出品啦... 咁『罕有』，所以結果都係『破咗戒』囉.... 我已經忍住手冇買埋同系列嘅電話袋嫁喇！希望最終都能夠把持得住喇...

Sanrio 30 位卡通人物精品系列 -- 磁石貼

 

仲以為上次已經一口氣掃哂同系列嘅所有精品添〔除咗一個筆袋冇買到之外〕！前兩日行經征服世界，又比我發現喺同系列之中，原來仲有一款精品未買嫁喎.... 見價錢唔貴，當然會買埋佢喇！

其實個 design 就冇乜特別，同上次款貼紙好相似，只係上次係貼紙，今次係磁石嚟姐... 主要都係為買咗之後，可以儲齊成個系列咋！