Sanrio Village 50 個聖誕傳奇明信片

上一篇提到 Sanrio Village 50 個聖誕傳奇呢個節目係 11 月 16 日已經開始左，因乜解究我會拖到今時今日，12 月都就快到先去呢？咪就係因為呢套明信片囉！

由於龍頭 Vi 既報紙訪問，我先知呢個活動係 11 月 15 日舉行開幕禮，其實當日已經想去，奈何果日又唔得閒，唸住 11 月 21 日就去，點知又比我知道 11 月 26 日開始先會有呢套明信片發售，為左要買到呢套明信片，唯有再推遲去青衣城既計劃啦.... 好彩終於都順利買到呢套明信片 lu...

雖然之前 Pekkle 都有出過明信片，不過我係一張都冇買過，依家終於都可以擁有 Pekkle 既明信片，雖然唔係 Pekkle 獨自一張，不過我都已經好心足嫁喇！

四款明信片都有閃粉點綴，設計都算唔錯，而且只要捐不少於 $10 比公益金就可以帶其中一款番屋企，我覺得係超值呀！

四款明信片中，就只有呢兩張有 Pekkle 份！少係少左 d，不過都好過冇啦！

值得一提既係，每張明信片都已經貼上 $1.4 郵票，可以隨時寄得出去，最特別既係每張明信片既郵票都有唔同既 Sanrio character，好靚呀！唔知有冇 Pekkle 份呢？

之前都已經知郵政署有個服務係可以印 d 專用郵票，不過如果冇記錯係每次最少要訂五十版，當時都仲未知 yahoo blog 有咁多 Pekkle fans，所以都冇上過心，唸住自己都冇乜可能可以訂到咁大量，依家唔知有冇呢個可能發起一齊訂 Pekkle 郵票呢？又唔知呢個動作算唔算侵權行為呢？

題外話：係青衣城既客戶服務部拎左呢張宣傳單張，得知由 12 月 3 日開始，一連四個星期都會有 Sanrio 既精品換，只要係商場消費超過 $800〔兩張單〕就可以換到.... 唔知係四款精品之中，會唔會有 Pekkle 份呢？有既話，即係代表住大家要預備定 "彈藥 "，連續四個星期走去青衣城消費換禮物 lu...

Sanrio Village 50 個聖誕傳奇

青衣城 x 杏花新城魅力呈獻：Sanrio Village 50 個聖誕傳奇
日期：2009 年 11 月 16 日至 2010 年 1 月 3 日

地點一：杏花新城 Sanrio 大宅

觀後感：期望過高，佈置簡單 / 平凡，有 d 被搵笨既感覺...

地點二：青衣城 Sanrio Village

觀後感：可能之前睇得太多 blog 友介紹，抱住期待同興奮既心情殺入青衣城... 點知...場地比我想像中細好多，老實講，一到埗睇到個 "規模" 之後，都咪話唔失望嫁！不過咁，佈置得都唔錯，都算係有 heart 果隻，所以雖然地方比較細，都可以算係不枉此行既...

晚上七點幾到達青衣城，排隊入場既人龍已經形成左 "三層蛇餅"，經過左一個鐘頭之後，終於都輪到我入場喇...

入到場，二話不說梗係 "跑" 到最入既 "郵政局" 位置先啦，點解？因為有我至愛既 Pekkle 扮郵差叔叔嘛！ 其實我當晚都影左好多相，由有 3 格全滿既相機電池，影到剩番一格，幾驚最後會影唔到呀！後來番到屋企 check 番，先知自己唔覺唔覺咁，已經影左百幾張〔場內場外合計〕，唔怪之得連電都用到冇哂！自己睇番都打左個突...

不過百幾張相入面，佔左八成以上都係 Pekkle 黎既... 係 Sanrio 既 promotion 之中會出現 Pekkle 既機會率，都唔知有冇萬份之一... 既然今次咁難得，所以我都按捺不住係咁影，就算係同一個角度既 Pekkle，我都影左幾幅，癲左一樣！

Pekkle 郵差叔叔 look，大部分 blog 友都已經 post 哂出黎，我都無謂再重覆，所以我今次 post 左 d 大家比較少影到既 Pekkle！場內有個電腦遊戲叫 "油油畫畫小畫家"，見到 Pekkle 有份梗係唔會放過啦！初初以為只係呢個畫面先有 Pekkle 出現，原來唔係嫁！入面個遊戲其中一個主角就係 Pekkle！！

不過真係要慢慢等佢出黎囉！等完佢出黎，又要一筆一筆咁同 Pekkle 上色.... 就係咁，入場限時參觀果 10 分鐘，話咁快就流走左.... 其實我只係主力影左郵政局同呢個 game，已經開始比在場既工作人員趕走... 

果晚忽然變左個厚面皮既人，無論 d 工作人員點趕都唔理，誓要影埋其餘三個主題屋同個 market 先好不情願咁離開！其實仲有好多細節位我都未影到，就比人趕走左！好唔甘心呀！排左一個鐘頭，只係睇左 10 分鐘...

Pekkle Jumbo Glass Mug

Pekkle 又有新貨喇！

由於一路以黎我買 Pekkle 新貨永遠都係 "慢人一步" 既關係，所以當今日放工之後，去行一田購物日 Manis counter 一見到呢件新貨時，就將自己一向 "算死草" 既性格拋諸腦後，都唔理佢會貴過征服世界幾多，都忍唔住買左一個番黎，希望可以第一時間 post 上 blog 同一眾 Pekkle fans 分享〔不過我相信 "第一" 呢個奢望都應該無法達成到，一定大把 fans 快過我...〕！

其實呢款特大玻璃杯係 Manis 見到都有一段時間，不過偏偏又係將 Pekkle 擺到最後先推出，真係激死人！但係咁都好，因為咁樣今次先可以比到個意外驚喜我...

一定要 360 度咁影低比大家睇下，因為我覺得呢個 Jumbo Glass Mug 好靚呀！以我記憶所及，Pekkle 之前係未出過同類貨品！今次應該都係首次...

雖然呢隻杯極大機會係只儲不用，不過我依然心思思想買多隻黎儲，因為我覺得好靚、好實用呀〔好實用不過一樣係唔會用！〕！

係比錢既時候，多口問句 sales 姐姐仲有冇其他鴨仔野，sales 姐姐就答我，本來今朝都仲有 d 絕版 Pekkle badge 既，不過比一個人掃光，佢仲話呢個人唔單只掃哂架上既 Pekkle badge，連佢地倉底既存貨都一件不留咁掃哂.... 一聽到 sales 姐姐咁樣講，唔知點解第一時間就唸起喪 Vi ，唔知係唔係真係你掃哂 d 貨呢？

之後行過隔離既 Gift Gate，見到佢地 d schedule、date book、月曆公仔開始減價，唸住趁機買番隻月曆公仔，但係唔知點解，個個公仔款都由 $99.9 減到 $59.9，唯獨 Pekkle 只係由 $99.9 減到 $79.9〔仲貴過征服既價錢...〕 咩事呢？乜佢地真係認為 Pekkle 咁受歡迎，唔憂去唔到貨咩？既然係咁，仲乜會出咁少出 Pekkle 既 products 呢？由於唔係平既關係，所以冇買到....

下一站就係去左雅芳婷，係 promotion leaflet 入面講，雅芳婷全部貨品照價再九折，奈何偏偏又係得 Pekkle 企硬 $109 一 set 單人床笠....結果又係空手而回... 最後一站就係睡衣部，Pekkle 只得睡衣，睡裙、晨褸同埋休閒服全部欠奉，原本唸住有七折都算啦！買套睡衣都抵，點知 sales 姐姐對我講，Pekkle 款全部賣哂，乜 size 都冇... 唔知聽日會唔會再番貨，叫我聽日再去過 check 下.... 

雖然心裡預算要買既 Pekkle products 最後都係買唔成，不過買到呢個杯都叫做有個意外收穫既，好過冇咁啦！

吐氣揚眉...

11 月 14 日，係一個所有 Pekkle 同好既大日子！！因為憑住我地鴨會社團首領『龍頭 Vi』 既瘋狂行為，終於都令到 Pekkle 可以 "光宗耀祖"，竟然可以取代 Sanrio 老大姐 Hello Kitty 既領導地位，登上本地兩份主流中文報紙，成為揭開 Sanrio 家族 50 週年係青衣城既慶祝活動序幕既主角...

明報 B20 版

之前明明聽過阿 Vi 嫌部刨冰機好貴〔好似係潮流特區有得賣，價值四位數字〕，原來佢已靜俏俏地係網上投左番黎.... 唔睇報紙都唔知添....

蘋果日報 A17 報〔A 版話哂都係主版黎嫁！都有 Pekkle 份，勁！！〕

呢篇報導，提到阿 Vi 既自製 Pekkle 精品，唯一美中不足係冇圖文並茂啦！仲有最緊要就係提到佢 "龍頭 Vi" 呢個名，如果我冇記錯，呢個名係阿 Vi 話吹水怪幫我地一班 fans 起左個名叫 "鴨會社團" 之後，我幫阿 Vi 起既... 估唔到阿 Vi 接受訪問之餘，都仲記得起我喎！ 〔希望我冇表錯情喇！〕

經過呢兩篇報導，希望令更多人認識到 Pekkle，不過最緊要都係 Saniro products 既生產商留意到，唔好只係顧住出 Hello Kitty 既產品，Pekkle 都一樣好受人歡迎嫁！

今次真係全靠阿 Vi，先可以令到報導所謂係 "冷門"、"小菜" 既 Pekkle 可以吐氣揚眉，真係多謝哂你！