i-Scream 手造甜品 Semifreddo

一向力撐 XTC 同 i-Scream 既我，睇雜誌知道 i-Scream 推出左新產品 -- Semifreddo，我又點會錯過呢？原本唸住要去 PP 或者 IFC 分店先有得食，點知前晚放工行過新城市分店，竟然比我發現左 "佢" 既蹤跡！一間連 i-Scream 最 classic、最得我心既 Dark Chocolate gelato 都冇得賣既沙田分店，竟然都有呢種新產品？梗係二話不說，即刻買左四杯番屋企慢慢嘆啦！連搭車過海既錢都慳番，正！！

好彩佢地都特製左 d 紙托同紙袋 for 外賣，size 剛剛好扣住 d 甜品杯，唔洗驚會倒瀉，抵讚！ 雖然距離屋企都有一段頗遠既路，好彩佢地又有乾冰供應埋，番到屋企都冇乜點溶到！

左起：芝麻、乳酪、芒果同朱古力

乳酪係比我家姐食既，佢既評語係：都幾滑、唔太甜...

芒果味係我媽咪既，佢話都幾好味，好滑，杯底有粒粒好似芒果乾既 "乾果" 都幾得意，不過佢話唔值咁既價錢囉〔平時買野比佢食唔會講佢知幾錢嫁，因為佢成日都會嫌貴、話唔抵... 不過今次係同佢一齊買，所以冇得呃！〕

呢兩杯當然係我自己食啦！朱古力味其實唔夠香濃，好彩感覺都幾滑既，好似食緊 mousse 咁囉！不過原來底部有 d 好濃烈既朱古力醬，加埋面層酸酸的好似橙既果醬〔其實係熱情果啫喱黎嫁〕，應該係岩岩好可以平衡番唔同既味道。如果一啖食哂三層既話，口感其實應該幾豐富、幾夾嫁！可惜我一早唔知道要咁樣食先可以食出個味道來，所以我食既時候既感覺係：先係好酸、再係感到好滑、之後就苦苦地咁！三種唔同層次既味道分開哂黎食！嘥哂！

芝麻味，可能因為佢個面鋪滿芝麻，所以整體感覺係好香芝麻味，同埋一樣都好滑囉！都唔錯既...

我都必須承認，我份人係有 d bias 既，呢 d 甜品其實同 mousse 好類似，係一般既 buffet 都係 d standard 野，但係我食 buffet 既時候，係從來都唔會食既！自己亦都從來唔會買 mousse 黎食囉！但係今次正正係因為 i-Scream 呢個品牌，令我專登捧場買黎試下。至於價錢方面，原價 $30 一杯，現推廣價 $25 一杯，三、兩啖就食完一杯，值唔值得就見仁見智咯！如果以我自己黎講，$30 我會寧願買番一球 i-Scream 既 gelato 食囉！起碼都多雪糕 d 嘛...

Sanrio Kids 散貨場

前兩日無意中睇到其中一位 Pekkle fans 肥 duck duck  既 blog，知道旺角新世紀廣場有 Sanrio Kids 既特賣場，入面竟然仲有 Pekkle 2006 年出既童裝賣，仲話個 counter 只會擺到 5 月 14 日〔星期四〕。由於睇到呢篇 blog 既時候已經係星期一既夜晚，而平日我根本無機會出到旺角，但係又心癢癢好想買，結果我就 print 左肥 duck duck 既 blog 出黎，麻煩左我屋企人幫我出旺角『照單執藥』喇....

呢件背心我覺得係全部貨品之中最靚既一件，可惜得番 140 碼，我咁肥獅大隻又點會著得落呃？相反另一位 Pekkle fans 檸茶就絕對無問題囉！

正面〔心口位置有 d pattern，都叫做有 d 車功嫁！〕

背面

zoom 近 d 背面既 Pekkle 圖案

V 領短袖 T-shirt〔正面〕

背面

牛仔裙，呢件 150 碼，試過就咁 "笠" 上身，著得落喎！不過我係唔著裙既....

正面

背面

呢條裙 d 公仔全部都係繡上去，唔係印上去既，又 zoom 近個 Pekkle 公仔比大家睇下先....

呢條卡其色既裙係頂大童裝 size，即係成 160 碼，當然都可以穿上，不過佢正面有排鈕，我始終都係 "賤肉橫生" 果隻，所以一坐低時，我果雙 "雄壯既雙腿" 已經將鈕與鈕之間既空位拉開哂，即係走哂光囉！好彩我唔洗著裙既姐....

正面〔其實係橡筋裙頭，唔明仲乜又要整一排鈕，問題係 d 鈕又唔係純粹裝飾，又真係解得開嫁喎！〕

背面

Zoom 近背面近裙頭位置既 Pekkle 公仔，其實如果件上衣長 d，蓋左個裙頭既話，根本就係乜野公仔都冇，加埋佢用既布料同顏色，真係唔講都唔知呢件係童裝衫....

雖然全部貨品都有三折，不過買左兩裙兩衫，都要 $237.6，比起雪藍之前買果 d，當然係雪藍果 d 抵好多啦！而且講到明係童裝，梗係要好似雪藍買左果 d 咁得意先叫童裝嘛！呢 d 款似比大人著多 d 囉！可惜當時我又錯過左，買唔到果 d 咁得意既 Pekkle 童裝，所以雖然今次既款唔係太過特別，都依然會買番少少作為彌補番上次買唔到既 "捐失" 囉！

Pekkle A4 File

全靠雪藍既第一手資料，今日就飛奔去 Sanrio 入貨....

十二點半去到 Gift Gate，可惜搵極都冇，正當好失望準備離開既時候，就見到有職員送左幾大箱貨到店舖。心唸：唔知 Pekkle file 係唔係箱入面呢？見佢地有排都未拆到箱，唯有去左食 lunch 先，食完 lunch 再去睇一次，果然已經上左架喇！

雖然雪藍話個設計冇乜大驚喜，不過我又幾同意檸茶所講，睇到呢個 file，感覺好有生氣，d 魚仔蹦蹦跳、鸚鵡就唱歌仔、連個 background 都係個光芒萬丈既太陽... 都好有夏天 feel...

file 正面

file 背面〔正如雪藍所講，魚仔明明係 Pekkle 既 "老死"，因乜解救 Pekkle 會釣哂佢地上岸既呢？真係費解...〕

失敗之作...

好多年前係街邊買既 DIY Pekkle 夾棉小包包，如今已比我用到黑黑黃黃咁，無論洗左幾次都無法回復本來面目，一路都想可以買番另外一個替換，可惜近年已經唔興有呢 d 公仔夾綿袋既車仔檔 lu.... 唔知係冇人再有呢 d 手藝？定係太老土呢

就係農曆新年之前，無意中發現一間整床品、窗簾既小店，竟然有 Pekkle 既夾綿布，既然自己冇小草佢地既手工咁好，不如就同呢 d 舖頭訂製，心想專業舖頭，品質應當有 d 保證卦？就係咁，我係一月中就同呢間舖頭落左 order，整左一個 A4 size 既側孭袋同四個可以裝零錢或卡片既小包包....

呢間舖頭已經事先聲明，年近歲晚訂單非常多，要過左新年先可以拎貨，既然我都唔係趕住要，當然係冇問題啦！可惜.... 惡夢就係咁發生左.....

2 月既第一個星期日開始，我差不多每個星期日都要去一趟取貨，每次佢唔係推說我未整、就話張單唔係佢跟唔多清楚、一係就話負責車袋既人唔得閒、再唔係就話佢放左假.....總之次次既理由都層出不窮....由於呢間舖頭既唔近我工作既地方，更加唔近我既住處，我係要趁每個星期日假期專程去拎貨既。無論電話 check 貨定係親身上門，佢地都總係答我：未有！下星期日你再黎，一定比到你...

如是者，由 2 月頭催到 3 月尾，終於都交到貨喇.... 原本當貨在手時，果陣既喜悅已經遮蓋哂之前既失望同忿怒.... 好可惜，喜悅既感覺只係維持左數秒，當我將製成品係膠袋度拎出黎 check 貨時，個心即時冷左一大截.... size 錯哂、手工差劣....唉.... 當我同個店主表示不滿時，佢仲話....

店主：下？size 唔岩？車細左呀？

我：唔係呀！岩岩相反！大得滯喇！

店主：哦... 大左姐！冇所謂啦！

我：下... 我訂貨當時係比埋 size 佢！仲要拎埋個實物比佢睇過嫁喎....〔我即時拎番我用緊果個 Pekkle 小包包出黎比對〕

店主：大左少少姐... 咁咪仲好... 比多左布你添呀！收平你啦....

我：下？你整大左比我，size 唔岩，你比我都冇用啦...

店主：你都唔知，我唸係得我老婆咁抵得唸，先會肯接你呢個 order 咋！好難車嫁！呢幾個袋就已經車左佢成日喇！車完之後佢條腰骨都痛埋呀！收你咁既價錢，真係收平你啦！

我：我冇迫佢接嫁喎！當時我比埋實物佢，問佢車唔車到，佢話冇問題我先 order 咋嘛...

其時，個店主已經行開做其他生意唔再理我.....

呢個就係我訂既 19吋長、14吋闊所謂 "A4 size" 既側孭袋...

四個所謂既 "小包包".....

好難形容比大家知，同我用開果個差幾遠，擺埋一齊比你地自己睇下就最直接...

舊果個款布係夾綿、新呢款又係夾綿，奈何新呢個既綿裡太厚，除左影響左個 "容量" 之外，仲令到個袋未裝野都已經有 "漲爆" 既感覺... 

一拼之下，大家可以見到個 size 差幾遠啦？我都唔明，已經比埋實物佢睇，比埋佢去量，我唔係專業就話會量錯 size 姐！佢地係靠車床單、窗簾維生嫁喎！！有冇可能會差咁遠呀？！

唉.... 拎住呢 d 袋番到屋企都唔知點算好.... 我呢個對手工一竅不通既人都覺得整得好差呀！依家收埋佢又唔係，拎出黎用就更加唔會！原本唸住 Pekkle 冇乜新貨，訂造好之後，可以擺上 blog 同一眾 Pekkle fans share 嫁嘛！依家只係求其擺係房入面個櫃面，連放埋入去我 d Pekkle 珍藏度都唔想呀！仲要日日都見到 "佢"，真係眼怨....

2009 年 Pekkle 八達通卡套

好彩今朝比沉悶既工作搞到冇乜 mood 做野，先會偷閒上網 casual browsing 一下，就係咁先可以係檸茶既 blog，知道 Pekkle 終於都有新貨出左喇！

好唔容易先 "挨" 到去食 lunch 既時間，即時飛落 Sanrio 入貨，係十個左右既存貨當中，好辛苦先摷到兩個比較 "四正" 既八達通卡套，其餘果 d，唔係有少少印歪左，就係摺位歪，變左上、下幅不對稱，未入貨既 Pekkle fans，記住 check 清楚個對摺位呀！

學雪藍話齋，無論係前、後幅既 Pekkle 造型都已經係好舊款，只係好 "行貨" 咁加多左個羽毛球拍而已... Pekkle 明明係好得意嫁嘛！就算唔想花腦筋搞搞新意思，其實 Pekkle 都仲有好多舊造型係比呢個更加得意囉....唔該做 design 果位 "仁兄"，比番少少 heart 喇！

入面可放置 SD card，不過對我黎講，作用不大...

其實我都好同意可愛小 win win、小草佢地咁講，最近 pekkle blog 實在太靜喇！所以雖然個造型係舊左 d，不過 Pekkle 有新貨出總比冇得出好既...

相信一眾 Pekkle fans 都好期待 Pekkle 背心套裝、file 同絹布潛水公仔既面世！大家要密切留意 "上市" 日期喇！