全靠雪藍既第一手資料，今日就飛奔去 Sanrio 入貨....
十二點半去到 Gift Gate，可惜搵極都冇，正當好失望準備離開既時候，就見到有職員送左幾大箱貨到店舖。心唸：唔知 Pekkle file 係唔係箱入面呢？見佢地有排都未拆到箱，唯有去左食 lunch 先，食完 lunch 再去睇一次，果然已經上左架喇！
雖然雪藍話個設計冇乜大驚喜，不過我又幾同意檸茶所講，睇到呢個 file，感覺好有生氣，d 魚仔蹦蹦跳、鸚鵡就唱歌仔、連個 background 都係個光芒萬丈既太陽... 都好有夏天 feel... 
file 正面
file 背面〔正如雪藍所講，魚仔明明係 Pekkle 既 "老死"，因乜解救 Pekkle 會釣哂佢地上岸既呢？真係費解...
〕
好多年前係街邊買既 DIY Pekkle 夾棉小包包，如今已比我用到黑黑黃黃咁，無論洗左幾次都無法回復本來面目，一路都想可以買番另外一個替換，可惜近年已經唔興有呢 d 公仔夾綿袋既車仔檔 lu.... 唔知係冇人再有呢 d 手藝？定係太老土呢 
就係農曆新年之前，無意中發現一間整床品、窗簾既小店，竟然有 Pekkle 既夾綿布，既然自己冇小草佢地既手工咁好，不如就同呢 d 舖頭訂製，心想專業舖頭，品質應當有 d 保證卦？就係咁，我係一月中就同呢間舖頭落左 order，整左一個 A4 size 既側孭袋同四個可以裝零錢或卡片既小包包....
呢間舖頭已經事先聲明，年近歲晚訂單非常多，要過左新年先可以拎貨，既然我都唔係趕住要，當然係冇問題啦！可惜.... 惡夢就係咁發生左.....
2 月既第一個星期日開始，我差不多每個星期日都要去一趟取貨，每次佢唔係推說我未整、就話張單唔係佢跟唔多清楚、一係就話負責車袋既人唔得閒、再唔係就話佢放左假.....總之次次既理由都層出不窮....
由於呢間舖頭既唔近我工作既地方，更加唔近我既住處，我係要趁每個星期日假期專程去拎貨既。無論電話 check 貨定係親身上門，佢地都總係答我：未有！下星期日你再黎，一定比到你...
如是者，由 2 月頭催到 3 月尾，終於都交到貨喇.... 原本當貨在手時，果陣既喜悅已經遮蓋哂之前既失望同忿怒.... 好可惜，喜悅既感覺只係維持左數秒，當我將製成品係膠袋度拎出黎 check 貨時，個心即時冷左一大截.... size 錯哂、手工差劣....唉.... 當我同個店主表示不滿時，佢仲話....
店主：下？size 唔岩？車細左呀？
我：唔係呀！岩岩相反！大得滯喇！
店主：哦... 大左姐！冇所謂啦！
我：下... 我訂貨當時係比埋 size 佢！仲要拎埋個實物比佢睇過嫁喎....〔我即時拎番我用緊果個 Pekkle 小包包出黎比對〕
店主：大左少少姐... 咁咪仲好... 比多左布你添呀！收平你啦....
我：下？你整大左比我，size 唔岩，你比我都冇用啦...
店主：你都唔知，我唸係得我老婆咁抵得唸，先會肯接你呢個 order 咋！好難車嫁！呢幾個袋就已經車左佢成日喇！車完之後佢條腰骨都痛埋呀！收你咁既價錢，真係收平你啦！
我：我冇迫佢接嫁喎！當時我比埋實物佢，問佢車唔車到，佢話冇問題我先 order 咋嘛...
其時，個店主已經行開做其他生意唔再理我.....
呢個就係我訂既 19吋長、14吋闊所謂 "A4 size" 既側孭袋...
四個所謂既 "小包包".....
好難形容比大家知，同我用開果個差幾遠，擺埋一齊比你地自己睇下就最直接...
舊果個款布係夾綿、新呢款又係夾綿，奈何新呢個既綿裡太厚，除左影響左個 "容量" 之外，仲令到個袋未裝野都已經有 "漲爆" 既感覺...
一拼之下，大家可以見到個 size 差幾遠啦？我都唔明，已經比埋實物佢睇，比埋佢去量，我唔係專業就話會量錯 size 姐！佢地係靠車床單、窗簾維生嫁喎！！有冇可能會差咁遠呀？！
唉.... 拎住呢 d 袋番到屋企都唔知點算好.... 我呢個對手工一竅不通既人都覺得整得好差呀！依家收埋佢又唔係，拎出黎用就更加唔會！原本唸住 Pekkle 冇乜新貨，訂造好之後，可以擺上 blog 同一眾 Pekkle fans share 嫁嘛！依家只係求其擺係房入面個櫃面，連放埋入去我 d Pekkle 珍藏度都唔想呀！仲要日日都見到 "佢"，真係眼怨....
好彩今朝比沉悶既工作搞到冇乜 mood 做野，先會偷閒上網 casual browsing 一下，就係咁先可以係檸茶既 blog，知道 Pekkle 終於都有新貨出左喇！
好唔容易先 "挨" 到去食 lunch 既時間，即時飛落 Sanrio 入貨，係十個左右既存貨當中，好辛苦先摷到兩個比較 "四正" 既八達通卡套，其餘果 d，唔係有少少印歪左，就係摺位歪，變左上、下幅不對稱，未入貨既 Pekkle fans，記住 check 清楚個對摺位呀！
學雪藍話齋，無論係前、後幅既 Pekkle 造型都已經係好舊款，只係好 "行貨" 咁加多左個羽毛球拍而已... Pekkle 明明係好得意嫁嘛！就算唔想花腦筋搞搞新意思，其實 Pekkle 都仲有好多舊造型係比呢個更加得意囉....唔該做 design 果位 "仁兄"，比番少少 heart 喇！
入面可放置 SD card，不過對我黎講，作用不大...
其實我都好同意可愛小 win win、小草佢地咁講，最近 pekkle blog 實在太靜喇！所以雖然個造型係舊左 d，不過 Pekkle 有新貨出總比冇得出好既... 
相信一眾 Pekkle fans 都好期待 Pekkle 背心套裝、file 同絹布潛水公仔既面世！大家要密切留意 "上市" 日期喇！
開左業都有三、四個月既 Cookies Quartet，係明星同名廚效應下，一直都好想買黎試下，農曆年前曾經到過呢間曲奇店，可惜當時佢地話因為近新年，所以只有禮盒裝出售，不設散賣。不過就好大方咁擺左幾個大玻璃樽既曲奇比顧客試食，當時試過一片，覺得都唔錯，不過驚其他款唔岩食，所以唔想買一盒咁多，唯有等過左農曆再黎過....
終於係上星期六有時間再去 Cookies Quartet，果然見到有包裝發售，每包售價 $48 - $58，視乎 cookies 種類而定。原本唸住買朱古力味既散裝 cookies，可惜賣哂，唯有買一包此店馳名既蝴蝶酥，唸住下次先再買其他，不過唸唸下，專登黎到呢度，冇理由只係買一包蝴蝶酥，結果始終都係買左一盒裝既什錦 cookies....
蝴蝶酥一包 12 片，$38。包裝抄足 agnes b. 既曲奇，不過不失啦！
什錦曲奇，一盒九款，$138。我幾鍾意個包裝，簡單得黎，又有少少貴氣咁...
計埋蝴蝶酥，此店共有十款曲奇。
總括黎講，蝴蝶酥確係幾鬆脆，不過純粹個人口味以言，就覺得如果甜度加強番少少就更加完美！至於 cookies，有果仁餡既 cookies 比較岩自己口味。至於我最愛、最有期待既朱古力曲奇，就難免有少少失望！可能期望太高啦！我覺得朱古力既味道尚未夠濃，同有少少偏甜左，雖然都好脆口，不過 cookies 太細片同太薄身，食完好似得陣 "風" 咁，回味唔到朱古力既感覺囉...
無寫 blog 已經有一段日子喇！因為始終都想呢個 blog 係以寫 Pekkle 為主，不過最近 Pekkle 又真係冇乜野可以寫... 為左唔想同一班 "鴨會社團" 既人減少接觸，唯為寫住其他野先啦！而我呢個 blog，除左寫 Pekkle，不外乎都係寫食既姐....
今次同大家介紹一間我已經幫襯左有一段日子既意大利雪糕店 --- i-Scream，以前佢只得金鐘太古廣場一間店，後來開多左間係中環 IFC，對於我呢個鄉下人黎講，真係非常之唔就腳，所以都唔係經常可以食得到.... 不過皇天不負有心人，終於都等到係沙田開佢既第三間分店，好可惜，我等左佢差不多都有一年喇！沙田分店始終都係冇引入我既至愛口味 ---- 黑朱古力，所以要食 i-Scream，我仍舊係會選擇係 PP 或者 IFC...
幫襯左都有好幾次，不過一次都未試過佢既 Gelato Art，今次即管就玩下喇！
嘩... 我至愛既黑朱古力呀~~
先揀雪糕球同配料....
好！Gelato Art 開 show！其實即係炒雪糕囉....個名懶好聽咁咋嘛...
炒完~
炒完之後，再加埋朱古力醬... 正！因為炒完之後又要搵地方影相，睇起黎好似好溶咁，其實炒完都仲 ok 既....
係 i-Scream 食既炒雪糕同係 Scoop 既差不多，不過 i-Scream 就有我至愛既黑朱古力，而且 d 配料都落得幾重手，一 d 都唔吝嗇，而 Scoop 既好處就係連裝雪糕個杯都係 ice-cream cone 黎既，即係可以食埋落肚，而且價錢都比 i-Scream 平囉.... 各有各好啦！
希望沙田分店可以快 d 引入黑朱古力雪糕，咁我就可以幾時食都得啦~
