草莓雜誌 - 2014 年 4 月號

望穿秋水，終於都等到草莓雜誌有 Pekkle 嘅贈品送喇！當然，要 Pekkle 擔大旗自己一個人印喺贈品上面，就應該冇乜可能嫁喇！不過阿 Q 咁唸，見到有 Pekkle 份，都總好過冇呃...

今期贈品係膠紙，幼成咁，仲要係雜錦公仔款，最初要睇到 Pekkle 有冇份，都唔係一件易事！

原本 10/3/2014 上官網都睇唔清楚今期贈品有冇 Pekkle 份，不過好彩本雜誌封底嘅底部印哂三款膠紙嘅款式，我就係去到征服睇實物時，先比我搵到 Pekkle 嘅蹤影咋！

一見到有 Pekkle 份，唔理咁多，即時買咗兩本番屋企先！

卷膠紙其實都幾靚，係漸變色，個質地亦都唔錯。只係雜錦款膠紙所印嘅公仔多到數唔清，一共分咗四幅相，先可以睇哂全卷膠紙一共印咗幾多位 Sanrio 嘅卡通人物！

第一幅... 冇 Pekkle...

第二幅... 見到嘛？Pekkle 開始入鏡喇！

第三幅... 一開始嗰 group 就有 Pekkle 份喇，企咗喺 XO 隔離...

第四幅.... 終於都一個 cycle，洗唔洗一次過印咁多公仔喺張膠紙上面呀？差 d 就錯過咗我心愛嘅 Pekkle 喇！

至於雜誌內頁，全本書搵勻都只係得一頁係有 Pekkle 份嫁咋！可憐...

放大全本雜誌唯一嘅 Pekkle，望梅止渴...

Hello Kitty World - 日本 Sanrio 官方網上遊戲

呢個網上遊戲雖然已經有一段日子，唔知有幾多 Sanrio fans download 過嚟玩呢？

呢個網上遊戲係要參加者，透過多種 playgroup 級數嘅遊戲去賺取金錢、心心同埋蘋果，再以所儲得嘅金錢、心心、蘋果去換取唔同嘅建設 / 地標，去打造成一個獨一無二嘅 Hello Kitty World... 而我最感興趣嘅當然就係 Pekkle 啦！

呢個網上遊戲一共有三款有關 Pekkle 嘅建設 / 地標可供換購，包括 ---

個人覺得最豪華嘅 -- Pekkle 遊艇



其次就係呢個 -- Pekkle 商店

但係偏偏最貴嘅就係呢個 -- 以草剪成 Pekkle 模樣嘅『裝飾品』... 其實呢件『裝飾品』又細個又有保護色，都唔知憑乜嘢可以賣到咁貴...

大部份建設都可以用真錢去購買，但係我又點會嘥呢 d 錢呢？所以我只可以係透過一 d playgroup level 嘅遊戲，去慢慢累積金錢、心心同蘋果去換取上述嘅設施...

好似係呢個揭牌配對遊戲，唔好以為呢個遊戲係考你記性喎，因為佢係唔會比你睇一次排位先開始，而係純粹靠你運氣去揭牌，要配到六對啤牌出嚟，但係機會就只有三次，好多時揭哂三次機會，都冇辦法揭到一對.... 完全係無技術可言，只可以靠運氣...

 

直到目前為止，屬於我 Phantom Pekkle 嘅 Hello Kitty World 已經建設成咁嘅樣，有關 Pekkle 嘅物品亦都已經換到哂喇！所以都冇乜 incentive 再玩落去喇！

7-11 x Sanrio Hello Party 2013 - 最後一擊

由於之前已經抽到兩個 Pekkle 天皇，再加上第二輪公仔已經冇 Pekkle 份，所以儲『印花行動』一早都已經放慢哂手腳。

心中早有打算，唸住喺第二期公仔出籠之後，要喺我經常出沒嘅旺區 7-11，再可以換到第一期公仔嘅機會係微乎其微，所以由第二期開始時，都已經暫停冇再換公仔，唸住等到最後登記時先一次過去換。因為有咗幾次喺 7-11 換 Pekkle 嘅經驗，估計佢地大概嘅 practice 會係喺最後兩星期左右，就會回收哂各分店所有公仔嘅『剩餘物資』番 HQ，然後根據顧客喺唔同分店登記嘅數目，再分發比唔同嘅店舖，亦唯有咁，我先有可能換得番第一期嘅公仔。

因為 25/2/2014 就係派發印花嘅最後一日，為免再要儲多 16 個印花，所以當我儲夠 160 個印花，可以免費換到 10 個公仔之後，就已經停止冇再喺 7-11 買嘢喇...

估唔到 23/2/2014 拎印花去登記，要等到 10/4/2014 先有貨可以拎，仲有冇耐 d 添呀？！我驚到時連張 receipt 都甩哂色囉...

沖繩手信 - Sanrio Characters 紙巾

農曆新年假期，友人喺日本沖繩帶番嚟嘅手信... 2014 年激新產品 - Sanrio characters 紙巾。

每一大包紙巾共有 16 小包，每小包都會印上唔同嘅公仔，當中當然係會有重複啦！經友人細心揀選，凡係可以搵得到 Pekkle 『蹤跡』嘅紙巾包，都掃咗番嚟比我...

紙巾正面

紙巾背面

zoom 近 d 先~

紙巾共有 24 款

根據包裝紙上嘅款式，紙巾包印有 Pekkle 嘅款式應該一共有 5 款〔只計包裝正面〕。

喺總數 48 包紙巾當中，就一共有 15 包紙巾〔正面、背面加埋共 7 款設計〕印有 Pekkle 個樣。都佔咗總數三成有多嫁喇，而且仲齊哂所有 Pekkle 有份嘅紙巾款式，算係有交代啦！雖然當中有 D 紙巾，只係一面印有 Pekkle，而唔係兩面都印哂 Pekkle，不過都已經好滿足嫁喇！

逐款慢慢睇下啦~

而整體嚟講，我就只係差兩款，就可以集齊全套 24 款嘅紙巾喇...

跟番包裝袋上嘅圖片去排位...就發現少咗右邊嗰兩款...

就係少咗呢兩款喇！好彩唔係 Pekkle...

因為剪裁嘅關係，印喺每張紙巾上面嘅 pattern 都會有少許不同之處，所以好期待紙巾上面會印有 Pekkle....

不過當我發現到張紙巾上印咗呢 d 字之後，就知道我呢個 "希望" 已經徹底地『幻滅』喇... 相信一向對 Sanrio、Pekkle 產品有相當認識嘅人，應該知道點解囉...

友人話去到沖繩之後，搵勻都唔見有 Pekkle 嘅產品，估唔到反而喺無心插柳嘅情況之下，就比佢喺 AEON 意外發現到呢款紙巾！睇嚟我同 Pekkle 都幾有緣喎~~

Pekkle 雅芳婷 19" x 29" 卡通舒適枕

呢個農曆新年推出嘅 Pekkle 舒適枕，估唔到雅芳婷會喺 2014 年推出番 2009 年嘅設計款式... 仲有冇 out 咗 d 添呀？
http://www.pekkle.hk/2009/10/pekkle-2009.html

不過咁，作為 Pekkle 死忠粉絲嘅我，只要係能力範圍所能負擔嘅〔包括金錢上、空間上同埋實際用途上〕，哪怕你推出番九十年代嘅款式，一樣照買！尤其係最近『餓』咗 Pekkle 新貨咁耐添...hahaha...

呢個舒適枕唯一美中不足嘅地方就係拆唔開嘅，即係話當要清洗嘅話，就要成個枕頭一齊拎去洗，都幾麻煩，如果要喺個枕頭外再加一個枕頭套嘅話，咁買呢個 Pekkle 舒適枕又好似冇乜意義咁囉...