Pekkle 日版船襪 (2)

多得 blog 友可愛小 win win ，我先唔會錯過呢對 2013 年日版船襪，其實喺上年年尾 Sanrio 都已經推出過 Pekkle 另一款日版船襪，今次已經係第二款嚟嫁喇！

無論係今年定係舊年嘅款式，都好得我歡心，所以就算平時都唔會著船襪嘅我，最後都係忍唔住買咗兩對。



將兩對襪拼埋一齊嘅時候，啱啱好就可以砌番成個 Pekkle 構圖出嚟！

今次呢對襪竟然係產自『台灣』，而唔再係一向嘅『中國』喇喎... 咁個成本係唔係應該仲貴 d 呢？不過售價又唔係好貴咋喎... 所以心理上今次係比上次嘅『中國貨』抵買咗好多...

7-11 x Hello Kitty & Friends Sweet Delight 公仔 - 最終回

上星期，終於都拎埋最後一批一共 15 個嘅 Sweet Delight 公仔。好好彩，15 個之中，一共有 2 個係 Pekkle，而且都唔係有太多重複嘅公仔，就算有重複，都係比較『受歡迎』嘅公仔，總算叫做有交代啦。

今次換購嘅 Sweet Delight 公仔都算係好精美，不過實在係太大個，連個盒都大過人，好阻地方囉... 依家屋企有幾十盒公仔，大紙袋都要裝滿咗兩個，正頭痛緊點樣處理佢地好...

今年開始，『Pekkle 界』似乎靜哂落嚟，三間獲日本 Sanrio 授權嘅本地持牌公司都冇再幫 Pekkle 推出新產品... 唔通 Pekkle 又要進入佢嘅『低潮期』？咁我呢個網誌豈不是要『關門大吉』？！

7-11 x Hello Kitty & Friends Sweet Delight 公仔 - 第十一週戰績

今次 Hello Kitty & Friends Sweet Delight 公仔換購行動都算係好順利，一早已經換到兩款 Pekkle 公仔，仲要每款都換到 2 隻，而特別版都好好彩比我換齊一套六個，對比起上次換 Sanrio Crystal Charms 嘅成績嚟講，今次都算係叫做有交代，已經好滿足嫁喇！

想換嘅公仔都已經換到哂，冇哂壓力 lu... 剩番落嚟嘅印花，可以隨意去換公仔... 目前手頭上一共有 153 個印花『存貨』...

唔少得嘅當然就係 Pekkle 印花貼紙嘅珍藏啦！儲咗咁耐，先儲得 40 個 Pekkle 印花咋！

提提大家，印花派發日期只係去到下個星二〔26/02/2013〕，而換公仔嘅時間就去到再下個星期二〔05/03/2013〕。仲有印花喺手嘅，記住要喺截止日期前去換公仔呀！已經咁多人換唔到情人節特別版公仔，大家千祈唔好連印花都蝕埋比 7-11 呀！

7-11 x Hello Kitty & Friends Sweet Delight 情人節特別版

7-11 x Hello Kitty & Friends Sweet Delight 情人節特別版喺 13/2/2013 上晝 8:00 開始換，有部份分店，喺半個鐘頭內就已經被搶購一空，有同事用咗四十五分鍾行勻佢所屬地區嘅 7-11，先比佢換到一隻！而我，好好彩地有位朋友一早幫我去換，結果就比佢換到該店最後兩隻情人節特別版公仔！

Kitty 同 Daniel 共用同一條頸巾，幾咁溫馨！睇下 Kitty 個樣幾冧，而 Daniel 紅粉緋緋嘅臉頰，唔知係因為天氣太凍乾燥所致，定係怕醜所以臉紅呢？

情人節特別版連個盒都寧舍 fancy 過人，有好多個心心圖案呀...





一對主角出場！四四正正咁擺喺度，感覺上好似日本嘅結婚公仔呀！對我嚟講，如果 Daniel 同 Kitty 換上 Pekkle 同 Ruby 就 perfect 喇！





情人節特別版公仔大特寫 - Hello Kitty





情人節特別版公仔大特寫 - Dear Daniel

原本以為六個特別版加埋一齊，係可以組成一架列車，實物到手後，先發覺原來係唔可以嫁！『高炒』之下，就可以知道點解會咁，其實係因為當你將兩個情人節特別版公仔拼埋之後，就會出現一支箭貫穿兩個心嘅圖案，勁 sweet 囉！試問喺心連心嘅情況之下，仲點可能容納到第三者呢？

Hello Kitty 即係 Hello Kitty，不愧為 Sanrio 嘅大家姐，龍頭地位果然係冇人可替代！照我估計，應該未到中午時份，全線 7-11 已經換罄！相信呢款特別版有好多人都換唔到。唔知係唔係有好多 7-11 店，內部已經一早 hold 住咗 d 貨呢？不過聽到 7-11 嘅店員講，今次情人節特別版只係番咗兩箱，比之前兩次特別版嘅數量為少，所以好快就換哂！呢 d 唔知係唔係 7-11 嘅市場策略，想掀起一個換購熱潮呢？

不過唔知 7-11 又有冇細心唸過，喺長假期當中，一個好應該可以舒舒服服、冚被大覺瞓嘅早上，好多人選擇寧願犧牲休息時間，一大清早就爬起身去排隊換公仔，可惜最後都係換唔到嘅話，佢地係會有幾咁失落呢？喺新年呢個高高興興嘅日子，為乜要搞到人地狼狼狽狽、東撲西撲、大費周章之後，結果都係換唔到公仔，令到大家都怨聲載道、失望而回呢？呢個情況，又係唔係 7-11 預期想見到嘅呢？喺鋪天蓋地嘅投訴聲之中，佢地呢個銷售安排，究竟仲算唔算係成功呢？希望 7-11 嘅市場部職員，會好好檢討一下啦！

Pekkle 地氈

新年就快到，又係時候幫屋企大掃除喇！當然，以我咁懶嘅人，落手落腳就一定唔洗預我，最多都只係會幫屋企添置一下家庭用品，而呢張 Pekkle 地氈就真係推出得啱哂時機嘞！正好換咗舊年紅色嘅 Pekkle 地氈！

呢張 Pekkle 地氈雖然用咗藍、白、黑呢 d 素色色系為主調，但係個 pattern 仍然發揮到佢『顏色鮮明』 嘅效果，個人就覺得呢張地氈好醒神、好靚，比上年張 Pekkle 賀年地氈更加合我心意！ 相信當今年換咗呢張地氈用嘅初期，又會有好似舊年首次用 Pekkle 地氈唔捨得踩嘅情況出現嫁喇！

呢張地氈係 Grand Smart (Trendyland) 2012 年嘅出品。