Pekkle 科學瓷醬油碟

早幾日百無聊賴上左吹先生間精品店既網頁睇下有咩新貨，無意中比我發現左呢套 Pekkle 科學瓷醬油碟系列...

〔一〕長方形〔約 3.5" 長 x 2.5" 闊 x 1" 高〕

〔二〕圓形〔直徑約 3.5" x 1" 高〕

〔三〕正方形〔約 3.5" 長 x 3.5" 闊 x 1" 高〕

雖然三隻科學瓷醬油碟既 pattern 都係一樣，不過 Pekkle 既大頭造型，加上叉匙、蛋糕、音符號等等既構圖，就好似開緊 party，睇到覺得好開心...  況且價錢唔係貴，又算係幾實用... 所以搞到之前仲『實牙實齒』話過唔會再亂買 Pekkle 既我，都忍唔住一次過買齊哂三個唔同既 size...

Pekkle 筷子

『最新』推出既 Pekkle 筷子，其實可以話係新貨，又可以話係舊貨，因為正正就係舊年推出既 Pekkle 碗筷套裝入面嗰對筷子。 





實用又美觀，價錢又唔貴，獨立包裝既紙套印有 Pekkle 公仔，仲係我至愛既藍色添...

Pekkle 2012 八達通卡套

2012 年最新款既 Pekkle 八達通卡套，今次又係『全家總動員』粉墨登場啦！

呢款八達通卡套既質地同之前其一款相同，除左軟膠質地之外，仲有 d 閃粉既效果。

你睇呢個 Pekkle 幾咁神乎其技呀！一隻手拎住杯凍飲，另外一隻手拎住魚竿釣魚... 唔知當有魚上吊時，Pekkle 仲有冇力去控制到支竿呢？

又釣魚、又踢足球，全部都係戶外活動，岩哂夏天出世、動靜皆宜既 Pekkle 啦！

內格冇乜特別，同以前一樣既八達通卡套一樣。

一年之前同款既八達通卡套賣 $9.9 一個，依家反而賣 $8.9 一個。喺呢個百物騰貴、通脹急升既年代，估唔到 Pekkle 精品呢 d 非必需品，反而會出現『通縮』既情況，真係難以置信...

Pekkle 再一次吐氣揚眉，上到『頭條』喇...

鍾意左 Pekkle 咁多年，以為 Pekkle 同我一樣都係 d 好低調既人，但係自從 2006 年開始寫 yahoo blog 之後，先發現原來自己並不『孤單』，鍾意 Pekkle 既人係大有人在既，呢幾年唔單只識到一班同樣鍾意 Pekkle 既人，仲因為龍頭 Vi 既關係，令到已幾近『絕跡』既 Pekkle，係本地 Sanrio 精品市場再次『活躍』起黎...

2009 年係 Sanrio 50 周年既慶典，一向係 Sanrio characters 之中，Pekkle 都算係籍籍無名既『大配角』，但係當年地鐵係旗下商場青衣城為 Sanrio 50 周年舉行既主題活動之中，Pekkle 竟可搖身一變，成為當年既主角之一，亦因為呢個活動，再加上抵得唸既龍頭 Vi，Pekkle 終於都吐氣揚眉，第一次登上報紙專訪...

估唔到係兩年幾三年後既今日，Pekkle 又再一次登上報紙，今次仲要唔再係 B 版，係真真正正既『頭條 A 版』...

雖然係叼左『一田購物優惠日』既光，但係呢段新聞僅有既三幅相之中，就有兩幅出現左 Pekkle 喇！睇下 Pekkle 幾叻仔！

睇唔清楚？唔緊要，zoom 大 d 比大家睇清楚... 首先係掛左係雅芳婷專櫃天花既 Pekkle 宣傳板...

其次就係有位內地遊客拖住既 Pekkle 旅行喼... 當堂覺得呢位先生好有品味~~

今朝番工前一睇到呢段報導就急不及待剪低佢留念，唔知各位 Pekkle fans 又有冇留意到呢？希望你地都可以 keep 得番呢份報紙收藏啦！因為網上版係冇呢位內地遊客拖住 Pekkle 喼既相嫁！

2012 年一田購物優惠日 --- 號外

 

一如以往，我又趁 lunch time 去一田打左個白鴿轉，先去睡衣部睇下有冇新款 Pekkle 既睡衣，可惜 Pekkle 只得一款舊既休閒服，之前已經買左，所以即時轉陣去到中間展銷場，因為每次 Uji 既 counter 都係擺係呢個位置，今次佢地 counter 既情況好似稍為好左，冇之前咁混亂、人山人海，可能 Uji 推出 Pekkle 雪狐絨系列實在太密卦？每半年都有一款，所以係食 lunch 既時間，都仲有 Pekkle 既雪狐絨被賣。當然，根據佢擺係 counter 上既四疊手寫單〔分別代表唔同款式〕睇黎，係四款雪狐絨被之中，Pekkle 依然係最多人買既一款，因為係四疊單之中，Pekkle 嗰疊係剩番最少既！可惜今日 Uji counter 唔多人，因為驚會比 Uji 既 staff 鬧，所以都唔敢影低張被同疊手寫單比大家睇。

睇完睡衣，再睇埋張被，就梗係去今次一田購物優惠日既重點推介 Pekkle 產品 ---- 行李喼。根據宣傳單張上所示，Pekkle 行李喼只有 29" 一個 size，原來仲有 20" 同 25"，一共三款，售價由細至大分別為 $499、$599 同 $699。




好可惜，係我發現有三個 size 選擇既同時，亦都見到掛係天花位置宣傳廣告上兩個大字 ---『售罄』...

有冇快成咁呀？九點鐘開始，一點鐘已經賣哂？！雖然之前已經『說服』左自己，個喼唔等洗兼嘥地方，唔會買！但係見到佢話賣哂，個心不期然又有 d 失落喎！我都係犯賤，可以擁有時就唔會珍惜，到冇左時又會好後悔... 

每次一田購物優惠日，係來回一田與沙田火車站之間既地方，總係會出現『人喼爭路』既情況，今次亦都唔例外。由於 Pekkle 有份，我比以前更加『金精火眼』想睇下有咩人會買左 Pekkle 喼。結果，係行去一田既路程之中，十個有買喼既人，有八個都係買左鬆弛熊既款式，全程路就只見到一名女士拖住個 Pekkle 喼，個喼既高度大概都去到呢位女士腰部對上少少既位置.... 心唸，如果我買左，究竟點樣先可以拎到呢個『龐然大物』番屋企，而又唔會整污糟 / 整花佢既呢...  去到一田之後，係恆生既 counter，又再一次比我見到 Pekkle 喼喇，呢次係一位男士，佢拖住 Pekkle 喼排緊隊換禮品，既然佢企定定排緊隊，正正就係我影相既大好機會啦！





原本以為只係得一、兩個人買左 Pekkle 喼，應該都仲有大把存貨乏人問津啦！點知原來已經售罄，仲要『消失』得無影無蹤添... 究竟係邊個咁犀利呢？腦海之中，忽然『浮現』左喪 Vi 同埋佢既＂御用掃貨速遞軍團＂... 會唔會真係佢呢...