Uji Pekkle 雪狐絨枕袋

舊年 11 月，Uji 推出左 Pekkle 雪狐絨套裝，但係因為我買既係單人床品，所以只係得一個枕袋，一路都好想配多個枕袋，可惜當時搵左好幾間 Uji 專門店同專櫃，都係搵唔到，店方仲話已經斷左貨，唔會再有新貨番...  雖然好無奈，不過都只可以放棄...

點知係『無心插柳』既情況之下，一個月前比我係地鐵站既 Uji 專門店見到有單買枕袋，雖然每個枕袋要賣成 $98，個人黎講都覺得稍稍貴左 d，不過最後都係考慮左唔洗五秒，就忍唔住買左一個番黎，終於都可以襯番一 set 喇...

Pekkle 紙摺扇

唔知係唔係因為年紀越黎越大，開始要懷下舊，最近氣溫都有成三十度，甚至更高，不過出街已經冇乜興趣帶手提電風扇仔，改為帶紙摺扇，除左懷舊之外，紙摺扇一來夠輕便，二來唔洗用電又夠哂環保嘛...





Ellon 今年推出既 Pekkle 摺扇依然係紙造既，唔知幾時先會考慮幫 Pekkle 推出布質既摺扇呢？布摺扇既有布既扇套，又比紙扇耐用，真正美觀又實用。希望不久既將來會有 Pekkle 布摺扇喇！

Pekkle 檯墊

Pekkle 今次又拖埋女朋友仔 Ruby 『出場』喇！

 

呢款 pattern 既檯墊分別推出左兩種唔同既質地，硬膠款既一包有兩張 ($24.9)，另外仲有一款軟膠既就係一包一塊 ($21.9)，感覺上硬膠比較耐用，而且價錢平好多，所以我選擇左買硬膠款既檯墊。

Pekkle 床上用品 2012

望穿秋水，事隔兩年半，雅芳婷終於都係今年既復活節假期再度推出 Pekkle 既床上用品喇！



今次雅芳婷推出既 Pekkle 床品，仍然係屬於該公司既『經濟系列』，所以無論係邊間百貨公司購買、有咩會員卡或者信用卡，一律唔會再有折扣優惠...



今年床品既主題係游水，戴住泳鏡、著起泳衣、泳帽，穿上水泡既 Pekkle，好夏天 feel，又好有活力；仲有，游緊『鴨仔式』既 Pekkle 濺起浪花，造型可愛到不得了，再加上顏色配搭得宜，試問 Pekkle fans 又點會忍得手唔買呢？

 

睇見咁得意既 Pekkle，真係有衝動想拆開包裝，不過考慮到一定摺唔番咁『好樣』，所以都係留番用時先拆啦...

 



因為忍唔到手，一口氣買左三套床笠加枕袋，同埋一個被袋...



其中只有一套係雙人既床笠，孤家寡人既我，買雙人床笠仲咩呢？梗係為左要『重施故技』啦！之前都提過，由於呢款 Pekkle 係屬於『經濟系列』，所以不設單買枕袋，而單人床笠又只會附上一個枕袋，所以我會同上次一樣，買多一套雙人床笠，搵人幫我裁剪成三個 『獨一無二』既 Pekkle 枕袋...

 

Pekkle note pad〔細〕

最新推出既 Pekkle note pad，尺寸約為 4" x 6"，一本共有三款唔同既設計，用色及設計都好奪目，紙質又唔錯、價錢又唔貴，可以拎番公司當 memo 紙用，正！

 

著住工人衭既 Pekkle 幾醒目！

 

 

呢款設計既 Pekkle 就好似比一個超大碼既夾公仔機夾住左咁。

 

糖果機做背景，色彩繽紛。



呢本 note pad 係 Ellon 既出品，無論係設計或者價錢方面都好好，唯一美中不足既地方，就係好似上次個有耳玻璃杯一樣，印錯左 Pekkle 個名，名咁重要都可以印錯，Ellon 既  design team 同 QC 都真係要好好檢討一下先得喇！