一田購物優惠日 2011

號外


一年兩次既一田購物優惠日將會係下星期四〔24/11/2011〕開始，收到宣傳單張之後，二話不說，梗係睇左有冇 Pekkle 既野賣先喇！

又有呀！又係限量貨品呀！唸起上次既『慘痛』經歷 ，唔知今次一眾 Pekkle fans 又會癲成點呢？今次係限量 100 件，數量比上次仲要少...   好彩既係，今次呢件限量貨，價錢比上次既貴兩百蚊，而且今次個被袋連枕袋都係雪狐絨毛，以香港既天氣黎講，似乎就唔多實用，其實連我自己都仲考慮緊買唔買好... 無論如何，都希望今次搶貨既人唔會好似上次咁癲〔計埋我自己在內〕啦！

Pekkle 電子鬧鐘

Manis 又有新佳作喇！因為近呢兩星期工作上都幾忙，所以冇乜點行街，所以我第一次見到呢個電子鐘，其實係 blog 友 Pekklebaby 既 blog 見到，一見到即刻『驚為天人』，第二日既 lunch hour 就已經急不及待買左番黎！

呢個電子鬧鐘真係好實用，有齊響鬧同計時既功能，而我最欣賞既地方就係有埋萬年曆，正！！

 

當我拎左個鬧鐘番 office 擺既第二日，一位唔係鍾意 Pekkle 既同事已經察覺到，仲大讚又靚又實用！聽到佢既讚賞，就好似 d 父母聽到其他人讚自己仔女一樣咁開心！ 呢個鬧鐘唯一可以挑剔既地方，就係唔知點解 Pekkle 個咀會變左白色，係方便印製？定係『手民之誤』呢....

Pekkle 聖誕系列鐳射貼紙

今次已經係 Pekkle 第二年推出聖誕系列貼紙，往年個『背景』就係聖誕襪，今年就係雪人，兩年都係鐳射貼紙，貼紙造型其實都係大同小異，不過價錢又唔係貴，而且都好有節日氣氛，所以明明都知自己唔會用，不過都一樣買左兩張！

Pekkle passport holder

又一新款既 passport holder ！究竟一個人可以有幾多本 passport 呢？

唔知點解呢個 passport holder 會有咁多格.... 好懷疑會唔會有人將本 passport 同咁多『林沈』野擺埋一齊呢？

 

Pekkle 花紙

Pekkle 又出左新款既花紙喇！

呢款花紙以 "音樂" 為主題，有五線譜、高音符號、四音符、八音符、耳筒等等... 不過估唔到連『遠古』年代既卡式機同卡式帶都有喎... 會唔會 out 左少少呢？