7-11 x Sanrio characters Joy to the Word 2015 系列 - 第一週戰績 (2/12/2015 - 8/12/2015)

唔知係因為冇乜嘢好買，定係因為 Pekkle 出現喺第二期換購活動，所以都唔係太積極，第一個星期只係儲得 48 個印花咋...

唔知點解今次張印花卡可以一次過貼 36 個印花，係為咗環保，定係其他原因呢？因為聽聞今次所有特別版都要用 36 個印花先可以免費換到一隻....冇嘢呀？36 個印花換一個公仔？我寧願『豪』廿蚊比七仔，加錢換一隻冇咁嬲啦！希望呢個傳聞唔係真嫁喇！





12 款印花齊哂，唔知係好彩定唔好彩，印花冇 Pekkle 份喎...





希望下個星期嘅『戰績』會好 d 啦！

7-11 x Sanrio Characters - Joy to the Word 2015 系列

7-11 又要我地一班 Sanrio characters fans 幫佢打工喇.... 全新一系列嘅換購又於今日正式開始喇！




今次所有 Sanrio characters 以 Tsum Tsum 咁嘅造型登場，我個人覺得就怪怪地囉...








一如以往，呢次換購活動都係分開兩個階段進行，第一個階段係換購顏色筆，好彩第一階段冇 Pekkle 份，可以儲下彈藥先。第二個階段換購嘅係『動物公仔』，唔知即係乜嚟？不過咩都好啦，有 Pekkle 份，仲可以走得甩咩？唔靚都起碼要換到一個，咁先對得住 Pekkle 啦！





第二個階段嘅『動物公仔』，一共有十二款。





天字九號 - Ahiru No Pekkle

老實講，呢個 Pekkle 個樣都相當醜下，唔知佢扮緊乜，個咀就似隻雞，個頭對角又似隻羊.... 唔知係乜... @@





第二階段嘅『動物公仔』將於 13/01/2016 開始換購，一眾 Pekkle fans，又係時候幫七仔打工喇！

一田購物優惠日 2015 (26/11/2015 - 30/11/2015)

一年兩次嘅一田購物優惠日今個星期四又開始喇！


 
睇哂整份宣傳單張，Pekkle 就只有一款新貨，睇嚟到時都要落場睇吓，執唔執到其他 Pekkle 平嘢先~

原本呢套家居服都唔錯嘅，除咗 Pekkle 之外，仲有齊 Pekkle 嘅女友同朋友，可惜，我個人真係唔太喜歡著過頭笠嘅睡衣，如果呢個 pattern 係開胸款式就好喇，一定會買，依家就會睇咗實物先再決定買唔買囉...

Sanrio Characters - 日版 A4 單行簿

最近日本又出咗一系列 Sanrio characters 嘅文具，有鉛芯筆、擦膠、筆袋同埋 A4 單行簿，pattern 都係一樣嘅，不過由於係雜錦公仔嘅關係，梗係『親疏有別』嘅，所以 Pekkle 只可以喺筆袋同埋 A4 單行簿中『亮相』。

筆袋要成百幾蚊，只係得一個 Pekkle 喺個筆袋嘅背面，好似唔係好值咁，依家仲考慮緊買唔買好...

而呢本 A4 單行簿咁平，再加上封面封底都有 Pekkle，梗係唔洗唸，即買啦！

封面



封底



zoom 近 d 封面嘅 Pekkle



close up 封底嘅 Pekkle



真正 Made in Japan，$22，抵買喇！



可惜內頁普通咗 d 囉，只係得單行線，完全冇印任何公仔，如果唔係就更加 perfect，貴 d 都買得過！

全新 2016 年 Pekkle 月曆產品

又係推出 2016 年年曆、月曆、記事簿嘅時候喇，好彩 Pekkle 來年將維持有座檯月曆、迷你掛曆同埋 Date book。Pekkle 嘅產品明顯已經買少見少，出年仲可以維持到有三款年曆產品，都算叫有交代啦！

座檯月曆

封面



封底



一月份 - Pekkle 學人溜冰，結果跌到死死下... ^^



二月份 - 走唔甩，梗係農曆新年啦！Pekkle 個口仲乜有一撻紅色？唔通係食緊 Pekkle 自己揸喺手入面嘅『冰糖葫蘆』？



三月份 - 唔知仲乜，Pekkle 無啦啦變咗 bb，仲要係咬住奶咀嘅 Pekkle 喎！Pekkle 明明都已經廿幾歲啦，大個仔喇嘛，仲要咬奶咀？@@

 

四月份 - 郊遊樂，仲要帶埋隻樹熊去野餐添喎，雖然 Pekkle 係嚟自澳洲，但係 Pekkle 身邊好似從來都冇樹熊出現嫁喎....

 

五月份 - 咁忙碌煮飯嘅？唔通係準備緊母親節餐飯？

 

六月份 - 下雨天？依家天氣反常，六月嘅香港都唔見得好多雨水...

 

七月份 - 同 Ruby 撐檯腳、食西瓜、飲凍飲，好開心咁喎...

 

八月份 - 大熱天時，梗係碧波暢泳啦！



九月份 - 一年容易又中秋...

 

十月份 - 梗係萬聖節啦！

 

十一月份 - 秋天，黃葉落~

 

十二月份 - 普天同慶聖誕節！

 

告示牌 - 放假中

 

告示牌 - 忙碌中

 

當然唔少得嘅梗係一整頁嘅貼紙啦！我真係有用嫁，唔好嘥嘛... ^^

 

2016 年 Date book，水手造型，呢種藍色同呢款字體幾靚，我就好鍾意喇！而 Date book 內頁每個月嘅主題係同座檯月曆一樣，所以唔再影喇！

Date book 封面



Date book 封底



迷你掛曆，同以前一樣，呢款掛曆，既可以座檯，亦都附有磁石，可以『貼』喺鐵櫃、雪櫃門上。三種用法，悉隨尊便。



迷你掛曆每個月嘅主題同座檯月曆又係一樣嫁，所以唔多作介紹喇！



細心睇下迷你掛曆個封面，Pekkle 似唔似喺度 selfie 梗呢？



2016 年嘅月曆產品設計上，整體都幾滿意，只係以下呢幅 Pekkle 嘅造型好似怪怪咁囉，望埋去好有『老翻』feel 呀... @@



仲有呢個 Pekkle『晴天公仔』個樣好詭異呀... 人地嘅『晴天公仔』係好可愛嫁嘛，呢個有少少恐怖囉...



下一輪就係熱切期待 2016 年農曆新年會有 Pekkle 新嘅賀年產品推出！