Pekkle 2013 年座檯月曆

今年座檯月曆嘅設計比以往花多咗少少心思，再唔係死死板板嘅長方形，但係售價就同舊年一樣，抵呀~

封底同去年一樣，又係有一篇『人物介紹』篇，只係比去年多咗一段以英文寫嘅 Pekkle 簡介，唔通今年開始，呢類貨品真係會外銷埋去新加坡、馬來西亞同埋印尼，所以就有中、英文對照？

離唔開一定會有嘅貼紙...

又係有中國、香港、新加坡、馬來西亞同埋印尼嘅公眾假期一覽表。

一月份有滑緊雪嘅 Pekkle 同埋朋友仔 Buuto〔Gift Gate 稱為 Boot〕，仲有就係情敵 Carl、魚仔 Pichi〔Gift Gate 稱為 Pitchi〕同埋鸚鵡阿 Pal...

二月份就係 Pekkle、Ruby、Buuto 同埋阿 Pal 一齊打鼓慶新年！

三月份就係 Pekkle、Ruby 同埋 Buuto 一齊搬復活蛋比賽，仲有 Carl 做評判及工作人員阿 Pal 添！Pekkle 係第一名喎...

四月份就係 Pekkle、Ruby、Pichi & Posty 一齊郊遊兼露營！

五月份就係 Pichi 同埋 Pal 忙於打掃，但偏偏 Pekkle 又偷懶瞓緊覺，仲要口中唸唸有詞咁講：I love Mom... 究竟 Pekkle 真係因為今個月係母親節而咁樣講？定係因為打掃對 Pekkle 嚟黎講實在太辛苦，呢個時候就唸起媽咪，心唸如果媽媽喺度，可以幫手做哂 d 家務就好喇呢？！

六月下雨天，冇帶遮嘅 Ruby 正等候 Pekkle 接佢去拍拖，同場仲有 Pichi 同 Pal 呢兩盞大燈膽...

七月 --- 喺海灘暢泳嘅 Pekkle、Ruby 同 Buuto... 瞓係水泡上面，感覺逍遙自在...

八月繼續炎夏，今次唔再喺海中暢泳，變左玩 wakeboard... 勁！不過仍然係同一套泳裝，大熱天時，同一套衫著左成個月仲唔換喎，咁唔合衛生嫁！

九月中秋佳節，人月兩圓...

十月又點少得萬聖節呢？

十一月，秋高氣爽，最適合郊遊...

最後一個月，最重要就緊係普天同慶嘅聖誕節啦！

Pekkle fans 唔可以唔記得嘅日子....

Pekkle 2013 年 Datebook

九月先啱啱開始，各款卡通人物 2013 年嘅座檯月曆、掛曆、日記簿、datebook 等紛紛出籠... Pekkle 當然都唔會例外啦...

依然堅守同一個原則：屬於有『時限性』嘅貨品，每次臨近到期日，甚或過咗期時，d 售價一定會大幅回落。所以無論有幾鍾意都好，新貨到埗時每款亦最多只會買一件！遇到 d 真係愛不釋手嘅款式時，等售價回落先再掃貨都未遲。

近呢一、兩年 Pekkle 嘅產品都興玩『家族 feel』，好多時都會全個家族總動員咁齊集喺各項新產品之上。今年呢本 datebook 嘅封面就係玩緊降落傘嘅 Pekkle 同佢女朋友仔 Ruby...

背面就係 Pekkle 同佢個 friend Buuto〔Gift Gate 稱呼佢為 Boot〕。





唔知點解今年嘅 datebook 同埋座檯月曆，都加咗新加坡、馬來西亞同埋印尼嘅公眾假期表，唔知係因為香港越黎越多呢幾個國家嘅移民，定係因為呢 d 貨品會外銷埋去呢三個地方呢？

 

Pekkle A4 plastic folder

Pekkle 最新款 A4 文件套，兩個字講哂：得意！

戴住 bow tie、打鼓 look 嘅 Pekkle，呢個設計應該都係第一次見...

論論盡盡嘅 Pekkle 真係搞鬼，人打鼓、佢打鼓，打到連個鼓都爛埋，仲要跌埋入個爛鼓裡面，一臉狼狽相... 而可憐嘅魚仔仲要比個水桶照頭笠住，唔知係唔係都拜論論盡盡嘅 Pekkle 所賜呢？




整爛咗個鼓，當然就要善後嫁啦！不過估唔到傻氣嘅 Pekkle 會以為鼓爛咗，同人傷咗一樣，都係用繃帶包紮『傷口』就得...

zoom 近 d 睇，唔單只個鼓，就連比個水桶笠住個頭嘅魚仔都不能『倖免』，一樣比 Pekkle 包到變咗條『木乃魚』....

agnes b. 黑朱古力雪糕杯

都好耐冇 update 過『生活點滴』呢個分類嘅 blog 喇！今次講嘅係 agnes b. 今個夏天最新推出嘅黑朱古力雪糕杯！

杯嘅設計以黑、金色相襯，再配以 agnes b. 嘅經典 icon -- 星星，一望就知係 agnes b. 嘅出品...

原裝法國入口嘅黑朱加力雪糕杯，好期待喎~~

杯蓋內藏有一支粉紅色嘅膠匙更，同杯雪糕嘅『格調』有 D 格格不入咁.... 再睇埋雪糕嘅顏色，就似乎唔多對版，應該唔會太濃... 有 D 失望添... 

果然係不出我所料，雪糕質感都尚算香滑，奈何若以黑朱古力味作賣點嘅話，朱古力味就未夠香濃囉！但係亦都未至於唔好食嘅，只係以咁嘅價錢買杯 140ml 嘅雪糕，你就會覺得 D『價值』應該好大部份都係落咗去個品牌上面囉！

日本 Sanrio 2012 年最受歡迎卡通人物選舉結果

今日 9 月 1 日日本時間 15:45 就係本年度 Sanrio 最受歡迎卡通人物選舉公佈結果嘅大日子，所以就算係行緊街都急不及待上網 check 下個結果，點知換嚟嘅喺超級失望嘅心情...

先嚟睇下今年嘅總票數先...




喺長達四個多月嘅投票期入面，一共收到 1,500,234 人次嘅投票，咁嘅票數算係多、定係少呢？因為今年係第一次公開選票數量，喺冇得比較嘅情況之下，無從分辨...

都係入番正題，睇下大家最關心嘅排名榜先啦！

第 1 - 10 位，已經有哂心理準備唔會有 Pekkle 份...




第 11 - 20 位，好緊張呀！因為上年排第 15 嘅 Pekkle，今年究竟可唔可以保持到呢個名次，甚或有所攀升呢？



真係好失望呀！頭 20 名都冇 Pekkle，比之前兩、三年嘅排名都仲要差！！真係無天理呀！！

第 21 - 30 位，終於都見到我至愛嘅 Pekkle 喇！今年佢竟然只係排第 26 咋，點解會咁嫁？！我睇完一次又一次，唔敢相信自己對眼，真係排 26？！

 


再望一望 Pekkle 嘅總票數，只係得 11,106 票？！唔係啩？我冇眼花呃嘛？總票數比起 7 月 27 日公佈最後一次投票走勢時嘅 23,941 票少左萬幾票咁多嘅？！？！





嗰萬幾票究竟去咗邊度呢？以為自己眼花，再睇清楚個網頁，最後就比我發現到呢個 message - 

嘩... 咁都得？黑箱作業呀！今年選舉好似好公平、好公開、好公正咁，又每週更新投票走勢、又公開投票數目，感覺上好似透明度大增，但竟然可以隨便一句『大量海外投票並不合乎規則』就將選票全數作廢... 唉...

大家睇下，之前我喺 blog 入面都提過，呢個人唔係人、熊貓唔似熊貓嘅 "Go Chan"，喺香港完全未見過佢嘅蹤跡，突然又可以係最後幾個星期從後趕上，依家仲比佢入埋十大，仲要係第 9 位添？！

唔好話我針對呢位 "Go Chan"，睇番個榜，我相信大家點都唸唔到，紅透香港嘅 "大口仔" 竟然係比 Pekkle 嘅排名仲要後... 係唔係令人難以置信，完全唔合邏輯先？"造馬" 成份真係好高囉！

如果個結果真係內定嘅話，下年我都係要唸清楚，仲應唔應該繼續浪費心機每日上網投 Pekkle 票...