日本 Sanrio 2012 年最受歡迎卡通人物選舉

一年一度日本 Sanrio 既最受歡迎卡通人物選舉又黎喇，Pekkle fans 記得唔好錯過喇！

上年選舉既『宣傳海報』，係以 2010 年既頭十名卡通人物為主，而今年就大堆頭，一百位卡通人物放埋一齊，Pekkle 雖然細細隻，不過都算好 sharp，一眼就認得到！唔知各位 Pekkle fans 又搵唔搵到 Pekkle 呢？

投票日期為 10/5/2012 10:00 至到 19/08/2012 23:59。今年將會係六月尾有個『中期報告』，而最後結果既揭曉日期為 01/09/2012。希望 Pekkle 可以由頭帶到尾，一路 keep 到頭十名位置喇！

 去年選舉排第十五位既 Pekkle，估唔到今年既候選編號係 93... 排到咁後既...

至於投票程序就比以往嚴謹，要輸入電郵地址及少量個人資料...

 

投票完成之後，會出現呢個畫面，講到明每人每日只可以投每位卡通人物一次，因為今年要輸入埋電郵地址，所以好難係一日之內不停咁投票比 Pekkle... 

如果同一日之內，重複投票一次或以上，畫面就會出現呢個『訊息』，叫你聽日先再投過...

 

雖然今年投票既方式複雜左少少，不過希望各 Pekkle fans 唔好嫌煩放棄，因為要保持 Pekkle『名列前茅』既紀錄，就要靠大家一同努力，每一日都要上網投票比 Pekkle 喇！

Sanrio Pekkle memo pad

Sanrio 早前推出左兩款 Pekkle memo pad，我覺得今次既 memo pad 真係做得好有 heart，無論係紙張款式既設計、定係 size、都係又靚又實用既... 值得一讚！

先黎睇睇細 size，大概係 3.5" x 5"。



又同女朋友仔 Ruby 一齊喇！今次 Pekkle 變身做 cameraman，而 Ruby 就負責採訪。

世界難撈，連 cameraman 都要『粉墨登場』...

內頁一共有八款唔同既設計，每款各有七張，一本一共有五十六張 memo 紙，設計都係圍繞番拍電視 / 電影既主題，真係靚到唔捨得用呀！

跟住就係睇下大 size，呢本約係 4" x 6"。

大、細 size 都係一樣靠膠封面上既『彩光』營造出閃粉既效果，係唔係令到平平無奇既 memo pad 即刻『閃耀、高貴』哂呢？

既然我鍾意既係 Pekkle，咁佢既產品梗係出現得越多 Pekkle 就梗係越好嫁喇！呢款大 size 既 memo pad，無論係封面或內頁，都有好多 Pekkle 做 backdrop 嫁，好正呀~~

大 size 一樣係八款設計，每款七張，一本一共五十六張。雖然呢款 memo pad 冇主題，但係見到咁多 Pekkle 都已經好滿足！

呢款紙又係有 Pekkle 做『佈景版』嫁！

影得唔係好清楚，呢款紙 backdrop 個 outline，其實都係 Pekkle 黎嫁！

呢兩款 memo pad 真係又靚又平又實用，唯一可以彈既地方就係紙質比較粗劣，有少少似再造紙，不過每張 memo 紙上面都已經印有七彩繽紛既公仔，所以偏黃左既紙質其實都唔係好覺眼，再加上賣得咁平，我覺得已經係物超所值喇！

Uji Pekkle 雪狐絨枕袋

舊年 11 月，Uji 推出左 Pekkle 雪狐絨套裝，但係因為我買既係單人床品，所以只係得一個枕袋，一路都好想配多個枕袋，可惜當時搵左好幾間 Uji 專門店同專櫃，都係搵唔到，店方仲話已經斷左貨，唔會再有新貨番...  雖然好無奈，不過都只可以放棄...

點知係『無心插柳』既情況之下，一個月前比我係地鐵站既 Uji 專門店見到有單買枕袋，雖然每個枕袋要賣成 $98，個人黎講都覺得稍稍貴左 d，不過最後都係考慮左唔洗五秒，就忍唔住買左一個番黎，終於都可以襯番一 set 喇...

Pekkle 紙摺扇

唔知係唔係因為年紀越黎越大，開始要懷下舊，最近氣溫都有成三十度，甚至更高，不過出街已經冇乜興趣帶手提電風扇仔，改為帶紙摺扇，除左懷舊之外，紙摺扇一來夠輕便，二來唔洗用電又夠哂環保嘛...





Ellon 今年推出既 Pekkle 摺扇依然係紙造既，唔知幾時先會考慮幫 Pekkle 推出布質既摺扇呢？布摺扇既有布既扇套，又比紙扇耐用，真正美觀又實用。希望不久既將來會有 Pekkle 布摺扇喇！

Pekkle 檯墊

Pekkle 今次又拖埋女朋友仔 Ruby 『出場』喇！

 

呢款 pattern 既檯墊分別推出左兩種唔同既質地，硬膠款既一包有兩張 ($24.9)，另外仲有一款軟膠既就係一包一塊 ($21.9)，感覺上硬膠比較耐用，而且價錢平好多，所以我選擇左買硬膠款既檯墊。