以我一向咁孤寒既性格，真係唸極都唔明自己點會無啦啦買左呢個 tote bag...
袋仔細細，大約係 7.5" x 8" x 4" 左右...
前幅
後幅
呢個 Mini Tote Bag 係日本 Sanrio Puroland 既限定貨品，標價為 $1,575 日元，但係香港就賣成... 計落似乎佢地既『食水』都幾深下喎...
不過算啦，加埋機票、旅費、入場卷等等，都應該差不多...
應該係分銷往美國既貨品... 雖然係日本既 design，不過依然係中國製造。
全個袋就只得一個 Pekkle 公仔，梗係要 zoom 近 d 比大家睇清楚啦.... 
著左日本傳統民族服飾、而又好似有少少纖左體既 Pekkle，睇落都幾醒目既... 
今日趁假期又去左旺角一轉，無意之中比我發現到 Pekkle 既家居服，雖然係老翻貨式，不過質素都相當唔錯嫁！
呢件家居服，全長有 32.5 吋，既可以當長身 T 恤著，又可以當裙著，悉隨尊便。Pekkle 經典既跌倒造型、仲有 Pekkle 既好友魚仔、P 字水桶、音樂符號、感嘆號等等... 就連 Pekkle 個名都冇串錯呀！仲好記得 Grand Smart 係 2003 年就曾經出過一批雖然係拎正 license，不過都係因為印錯左 Pekkle 個名，搞到正牌都『慘』變為老翻既 products！
所以基於以上種種『因素』，以老翻貨黎計，呢件都可以算得上係真正既『A 貨』。 只可惜得粉紅色，如果有藍色就好啦！
前幅
後幅
終於都等到草莓雜誌既贈品有 Pekkle 份喇！！
今期草莓雜誌既贈品係一本大概 A5 size 既記事簿，一共有五款。
其餘四款都係以個別 Sanrio 既主角做封面人物，就只有呢一款係集眾 Sanrio characters 於一身既，而 Pekkle 就係其中一員！
封面
封底
封面全頁
內頁〔可惜內頁冇 Pekkle 喇！〕
zoom 近 d 個封面先！其實係個『超級巨無霸』既造型。
Pekkle 位處於第二層。邊個會咁殘忍，想食左佢地呢？成 set 巨無霸餐，有埋可樂同薯條配襯，仲要寫埋 "100% Yummy"、"New Burger" 既字樣添.... 好『血腥』呀~~
最新推出既 Pekkle 環保袋，可能自己都係比較偏愛藍色卦？個人覺得比之前綠色果個環保袋既設計仲要靚呀！
初初睇呢個包袋，真係估唔到原來係環保袋....
打開左就係咁嫁喇！又係『舉手投降式』既 Pekkle 造型。唔知係唔係自己既錯覺呢？我覺得呢個 Pekkle 個身形好似 slim 左、拉長左 d 咁.... 冇以前咁肥嘟嘟，又可能由於個身形 slim 左，所以又好似 "影" 得 Pekkle 頭大身細左 d 姐...
唔好以為好似之前個綠色環保袋咁，『有面冇底』喎.... 呢款 Pekkle 環保袋，係連個袋背都印左魚仔係度嫁！好 cute 呀~
唔單只前、後幅都印左唔同既公仔，仲要係袋口加埋索繩，唔知個成本會唔會高左好多呢？
話明係環保袋，梗係要隨身帶住先有用，但係又唔會就咁拎住一大個袋咁行街.... 所以呢個環保袋係可以摺埋嫁！『幾經辛苦』之下，終於都摺好左，依家就比個 "360 度全方位" 角度既環保袋比大家睇下！
個人覺得，如果可以改善埋以下呢幾點既話，咁呢個袋就 fit 哂我 lu：
〔一〕藍色調番深色少少，日日帶住係身，深色點都會比較『襟新』！
〔二〕呢舍環保袋既 size 太細啦！sales 話可能會出大既 size，期待中~~
〔三〕自己本身唔係好鍾意魔術貼呢樣野，因為如果撕、貼得太多次既話，魔術貼好易會 "披" 哂口，到時就會又肉酸、又貼唔實。而且呢個 size 計得太貼，夾硬黎先可以勉強將個袋捲好貼住，都幾麻煩...
唔知大家有冇同感呢？
正如 Pekklebably 話齋，唔知點解最近出既 Pekkle products 都用左綠色作為主色，明明事事都以藍色行頭既 Pekkle，同綠色好似唔多夾、有 d 怪怪地既感覺。唔通連 Pekkle 都想趕潮流，追求『綠色生活』？！
呢個 design，令我唸起迷彩衫.... 唔通 Pekkle 想去打下 war game？！
正面
背面
