都唔記得咗有幾多年，冇再見過 Pekkle 出現喺呢啲充滿聖誕節日氣氛嘅港版產品之上，反而三兩年前，日本出嗰張 Sanrio characters 音樂聖誕卡都有 Pekkle 份... 今年，終於都等到有港版 Pekkle 聖誕產品喇...
一盒 12 張，共 3 款設計。
款式一：聖誕襪
上面嗰張係聖誕卡前後雙封面設計，而下面嗰張就係聖誕卡嘅內頁。
款式二：聖誕樹。呢款聖誕卡一共有兩個 Pekkle 呀！封面及內頁各一個，正！
上面嗰張係聖誕卡前後雙封面設計，而下面嗰張就係聖誕卡嘅內頁。
款式三：室外雪景。初初睇個盒時，以為呢款聖誕卡係冇 Pekkle，仲唸住抽出呢四張聖誕卡送比鍾意其他公仔嘅朋友，點知拆開包裝一睇，先知原來呢款聖誕卡內頁都一樣會有 Pekkle。
呢款聖誕卡係比較『特別』，唔係書本雙開式設計，所以 Pekkle 唔算係喺封面，反而係屬於內頁。
每盒聖誕卡跟六個紅色及六個綠色信封，充滿聖誕氣氛。隨盒附上紅、綠彩繩，以供款式一及款式二嘅聖誕卡作吊飾用途。
今年 Pekkle 真係好叻仔，除咗登上 Sanrio characters ranking 香港區冠軍之外，Pekkle 嘅精品仲一浪接一浪咁『湧』埋嚟，雖然買到食樹皮都唔得掂嘅地步，但係終於見到 Pekkle 有吐氣揚眉嘅一日，感覺超正呀！
過咗聖誕節，下一個節日就係華人嘅『大日子』 ---- 農曆新年，好期待到時 Sanrio 會繼續推出更多 Pekkle 嘅賀年產品！
No comments:
Post a Comment