Sanrio 50th Crystal Charms - 首週戰績

之前話 7-11 呢個 Sanrio 50th Crystal Charms 既 promotion 係影響深遠既原因，相信當大家睇完我呢篇 blog，就會略知一二...

1/12 開始既 promotion，截至 5/12，雖然只係過左短短 5 日，但係已足以令我失左理性。 每個工作天，番工前、lunch hour、放工都會蒲下 7-11 睇下有咩買，至於星期六、日唔洗番工既日子就更加癲，真係行到邊搵到邊，每見有 7-11 都入去睇下有冇野可以買，每日就算冇野須要買，都會揀 d 有額外印花既物品去買，明明係唔岩用，買完番黎寧願周圍派都要買，務求令自己每日最少都可以儲到 10 個印花先會滿意，終日滿腦子就只係計算住買 d 乜、點買法先可以換到最多既印花。

又由於呢個 promotion 係會分兩期推出唔同既公仔吊飾〔特別版唔計〕，而 Pekkle 就會係首輪推出，而第一輪可以抽到 Pekkle 既機會係 1/19，如果去到 12/1/2011 第二輪推出之前都仲未換到 Pekkle 既話，抽到 Pekkle 既機會就會由 1/19 "急降" 到得番 1/35！！ 

有見及此，我就用左個自以為好醒既方法去換，明明都有過百個印花儲備係手，最後都決定用以 5 個印花加 $20 既方法去換，一心係想係最短既時間內，換到最多既吊飾，唸住數量越多，抽中 Pekkle 既機會就自然係越大啦！可惜一向黑仔既我，實在高估左自己既運氣..... 連日黎用左四百幾蚊，就只係換到呢 d 公仔吊飾番黎....

其實依家唸番都好肉痛呀！以換公仔用左既四、五百蚊，再計埋係 7-11 亂買野黎換印花既錢，真係足夠食到一餐幾唔錯既晚飯，又或者買件新衫著下，都總好過用黎買左 d 自己唔鍾意既公仔呃！

所以由第二週開始既今日起，我唸我唔會再用呢個方法去換吊飾喇，只會儲夠 15 個印花先去免費換領，一切就聽天由命啦！正所謂：命裡有時終雖有嘛....

天可憐見，希望我可以快 d 換到個 Pekkle 吊飾啦！