Tuesday, September 28, 2010

Sanrio 50 周年紀念版吊飾

上一篇提到,我有個理由所以先會咁遲 post d Pekkle 新貨出黎,今次就同大家開估啦!


心水清既你地,可能都留意到,我既 Pekkle 新貨大部份都係 Gift Gate 入貨,除左因為有會員折扣之外,就係因為個小禮物囉!相信去過 Gift Gate 買野既朋友都知道,只要唔係 on sale 既日子,係 Gift Gate 買野滿一百蚊以上,都會附送一個小禮物〔不過係日本既 Gift Gate 買野係不論消費額都會有呢份 "小禮物" 嫁!〕早幾個月一次無意之中行 Gift Gate 時發現,當時送既小禮物竟然係 Sanrio 50 周年公仔吊飾,仲註明係第一彈,搵哂成張海報都見唔到有 Pekkle,再問個 sales,佢話大概 9 月會有第二彈、遲 d 仲會有第三彈、第四彈.... 到時可能會有 Pekkle.... 就係咁,我忍住手唔買 Pekkle 既新貨,等呀等、等呀等,等佢第二彈既來臨.....


終於都係 9 月等到佢番貨喇!拿拿聲就走去買野,點知頭三次都碰左壁,第二彈公仔未到,換黎既只係得 Jewelpet 既吊飾,好失望呀!仲要浪費左三次機會,『嘥』左三百幾蚊...



之後確實左 Sanrio 50 周年公仔吊飾第二彈既番貨日期之後,當日既 lunch 就立時飛去一田既 Gift Gate 入貨,搵勻間舖又冇好似上一次間 Gift Gate 咁,有 poster 貼出黎,唯有問 Gift Gate 既 sales 呢一彈會唔會有 Pekkle 啦,點知個個都 "突然" 政治部上身咁,守口如瓶,答案模式一樣:依家係送緊 50 周年公仔第二彈,不過唔好意思,冇得揀公仔嫁!而且 d 公仔封住左,我地唔會拆,所以唔知係咩嫁!


聽到佢地咁講,梗係失望到暈喇!首先唔知呢彈究竟有冇 Pekkle 份,再加上我一向都好黑仔,抽得中 Pekkle 既機會似乎都係微乎其微....



好彩,皇天不負有心人,前前後後用左千幾蚊買 Pekkle,終於都抽到一個 Pekkle 吊飾喇,開心到死....



其實 Pekkle 塊面有 d 污糟,用濕布同擦膠都抺唔走 d 污漬,雖然係有 d 唔完美,不過當你用左咁多錢,抽左咁多隻公仔之後先可以擁有一隻 Pekkle,你係唔會再有埋怨,反而係覺得好感恩囉!



個吊飾雖然係細細粒,不過都做得 Pekkle 好靚仔,戴住紅色 bow tie,變左隻 "煲呔鴨"...



部 DC 比較弱,zoom 得太近就 focus 唔到,唔知大家留唔留意到 Pekkle 眉心之間有 d 黑色既污漬?雖然係有 d 瑕疵,不過阿 Q 咁唸,正所謂 "無人完美" 嘛... 咁先顯得 Pekkle 夠 "真"!亦都無損 Pekkle 既靚仔 look 呃....



雖然係 Made in China,不過唔知係唔係因為有日本總公司監督,中國製得黎都好靚!好鍾意呀!



就係因為發現呢一彈原來係有 Pekkle 份,我呢個月真係 keep 住差不多隔一、兩日就會去 Gift Gate 走一轉,睇下有冇野可以買,祈望抽得中 Pekkle!希望係新一彈來臨之前,我可以再抽到多一個 Pekkle 啦!


 


後記〔更新於 09.11.2010〕:


依家 Gift Gate 已經推出新一輪 Sanrio 50 周年第三彈吊飾,今次冇 Pekkle 份 lu,第二彈亦已經派哂!埋單計數,收穫如下:


前前後後一共換到 9 個吊飾



就係呢 9 款喇!



無錯!我係 "抽" 多左兩個!依家一共有 3 個 Pekkle 吊飾喇!



細心睇既話,應該都睇到 3 個 Pekkle 之中,有兩個都係有污漬,不過冇所謂啦!最緊要係 Pekkle,能夠擁有 3 個,縱使有少少 "缺憾",都已經好開心喇!


1 comment:

  1. 可唔可以用FILTER 沫走呢?!
    稀釋白油O個D透明液體呀!!!!
    [版主回覆11/28/2010 14:50:00]試過啦,唔 work 喎....
    又唔敢大力捽,因為驚一唔小心,連 Pekkle 條眼眉抺甩埋嘛...

    ReplyDelete