今次係用上 1000 針嘅布，感覺應該係會更順滑、更柔軟，而且應該會係更加耐用嘅，事實係唔係咁樣，就要用過先知喇。不過，亦都係因為咁，價錢比以往推出嘅系列貴好多，但係咁難得有 Pekkle 新花床品喎，又點捨得唔買呢？最多咪買少套囉...
因為價錢問題，我今次只係買咗一套床單同埋一個被袋，都已經要七百幾八百蚊... 真係有啲貴，所以都冇再買多一套做後備／收藏...
今次呢個設計好靚呀，以往我都係只愛 Pekkle 一個嘅設計，有少少嫌棄佢家族嘅其他成員嫁嘛，估唔到今次出哂『一家大細』嘅設計，我都會咁鍾意囉... hahaha...
無論係張床單、被袋，抑或係枕頭袋都好靚... 以我所知，雅芳婷一向都有為呢個系列嘅床品，另配個裝枕袋發售，唔知點解，偏偏今次 Pekkle 呢款又冇喎，仲想平平地買個枕袋收藏，可惜冇得賣。對於我呢啲瞓單人床嘅人嚟講，得一個枕袋都唔夠我用，強烈希望雅芳婷稍後會推出 Pekkle 個裝枕袋發售啦！
另外，雅芳婷都有推出同款嘅攬枕，分大、細兩個 size。個人覺得，大 size 嘅花靚過細 size 好多，但係如果買個大 size 嘅攬枕番嚟擺喺我嗰張已經擺滿大、小 Pekkle 公仔嘅單人床上面，我唸，我應該都要轉為打地鋪瞓... 所以，結果我都係冇買到個攬枕囉。
一唸起今年新年可以有新花 Pekkle 床品用就開心哂！希望雅芳婷可以 keep 住落去，就算唔可以每年都出新嘅 Pekkle 床品，最少都可以每兩年出一款呃？
No comments:
Post a Comment