第一款係最先推出既 Dreyer's Deluxe Collection - Belgian Triple Chocolate。隨住香港人更加識飲識食，Dreyer's 已經由從前既雪糕名牌，『降格』左去 "平民雪糕" 級數。 Dreyer's 係香港曾經 "消聲匿跡" 左一段時間，近兩、三年又好似 "捲土重來" 咁... 無論係雪條、甜筒、定係雪糕杯全部都試過哂，無乜大驚喜，惟獨呢一款 Belgian Triple Chocolate 令我有一試難忘既感覺。
原則上我只喜愛黑朱古力，相反就好抗拒絕白朱古力。所以當我買呢款雪糕之前，都掙扎左一陣，好彩都冇選擇錯誤。個人覺得，呢款朱古力雪糕果種濃得化不開既黑朱古力味道，再加上大眾化既價錢，真係比好多雪糕專門店或者係朱古力 名店既朱古力雪糕更為香濃、更抵食，完全岩哂我呢個鍾意特濃朱古力口味既人！
至於呢款 Haagen Dazs 既流心朱古力雪糕，我係比佢既流心吸引而買，因為單睇雪糕既顏色，原本都唔期望佢會太過香濃，只係唸住加埋雪糕內既流心朱古力漿，應該都可以 "彌補不足"...
食完之後都有 d 意外驚喜，雖然朱古力味唔夠 Dreyer's 咁香濃，不過好滿意佢既 "流心" 效果，我已經冇跟足指示要將盒雪糕擺係室溫 5 分鐘，等雪糕內既朱古力漿溶化後先食，但係都一樣做到有流心既效果，感覺 "神奇"....
最後呢款係 Amiko 既雪糕，以價錢而論，係三款雪糕之中最貴既，可惜亦都係令我最失望既一款！
一係唔買，一買就買左四款唔同既口味，最先試既當然係我既至愛 Chocolate Hazelnut。原本我係想買純朱古力，不過 sales 姐姐話 Chocolate Hazelnut 係期間限定，又係新口味，仲話其實同朱古力差唔多，只係多左一種榛子既味道... 除左朱古力之外，我最愛就係果仁，所以最終都係買左呢款朱古力榛子試下。
其實並唔係話佢 d 雪糕唔好味，只係作為一個黑朱古力既愛好者黎講，呢款朱古力就真係差左少少囉！佢既雪糕係好滑，亦都好香奶味，果仁味都好出，只可惜以我食 Dark Chocolate 為目標既準則黎計，呢款雪糕就確係三款之中，比較遜色既一款！
總括黎講，食野呢 d 都係好個人既口味，好難定好與壞，我覺得好正既 Dreyer's，未必岩哂所有 chocolate lover 既口味，同樣道理，我覺得遜色既亦唔代表佢係差既... 呢 d 都純粹係個人既喜好。大家有興趣既話，都可以買黎試下嫁！
No comments:
Post a Comment