Pekkle 手錶

又係果句，我發誓，我睇 catalogue 時，真係話左唔會買呢隻錶嫁喇！原因係我之前實在已經買左太多隻 Pekkle 手錶，而我本身已經唔係習慣戴錶既人，呢隻錶仲要係膠錶添，更加唔會戴囉... 但係... 神推鬼使之下... 又... 買... 左...  

點解會買？理由好白痴，完全係因為呢個盒上面既 Pekkle！我覺得 Pekkle 印係呢個透明膠盒上面，真係好靚同好吸引呀！ 

不過... 呢個理由似乎太過薄弱... 好似唔夠說服力... 不如都係怪自己定力唔夠把啦...

Pekkle Name Tag

就咁睇，呢款 name tag 既款式同將會推出既証件套連頸繩係一樣既，原本都唸住只買有頸繩果款唔買呢款... 不過見到佢既 "特別之處"，又忍唔到手...

佢既 "特別之處" 就係呢樣野喇... 個鴨頭係可以 360 度旋轉嫁！係唔係好 "詭異" 呢？ 不過偏偏我又覺得好得意喎！

睇到呢個 "鴨頭 360 度自轉" 既奇境啦！係唔係好搞笑呢？

Name tag 背面

Pekkle 鎅刀

印象之中，Pekkle 係從來都冇出過鎅刀，呢樣野真係大人、細路都咁岩用... 既實用、價錢又超平... 二話不說，就買三把！

雖然仆倒既 Pekkle 係 Pekkle 九十年代既經典既造型，冇乜新意... 不過今次 d 字體套用左比較少見既款式，以咁既價錢，有咁既設計，都算叫做有交代啦！

Pekkle 30cm 膠間尺

其實呢把膠間尺冇乜特別，只因間尺右手邊有我至愛既 "肥版 Pekkle" 係度扮歌手，仲有襯哂我呢個電視精既電視機... 所以先買左兩把！

Pekkle 鉛芯筆

上年出既鉛芯筆係寫到明 0.7mm，但係就好似唔係咁受人歡迎，不過我自己就比較喜歡用粗 d 及深色 d 既筆寫字，所以 0.7mm 就岩哂我... 今年呢款就冇注明係幾粗，我唸要搵 d 筆芯試一試先知...

著住工人衭既 Pekkle 唔知係唔係表演緊 "雜技" 呢？

呢支筆比上年既較貴，我唸就係個質感既分別卦？今年呢款拎上手時，感覺上係比較粗身同埋 "紮實"，但係可能係太 "紮實" 既原因，我到依家都仲未開得到個筆筒，試唔到筆芯，唔知係唔係因為我有 "手腳唔協調症" 呢？

肥嘟嘟 Pekkle 筆筒

肥版 Pekkle 穿起空手道服，好似好威風咁喎... 不過人地空手道就踢板、劈磚頭，睇下我地呢隻傻傻既肥鴨係度 "劈" 緊咩？係香腸呀！！做緊運動都仲掛住食野... 想唔肥都幾難啦！

 

睇真 d... 呢隻小肥鴨仲要 "阿 Q" 到話呢 d 香腸係 "Healthy Sausage"... 眾所周知，香腸係『三高』食物既佼佼者... 點樣健康法呢？呢隻小傻鴨，為左有得食，真係咁樣 "催眠" 自己都得既？

我真係好鍾意呢個肥版 Pekkle 呀！"論論盡盡" 咁... 更添可愛！！

Happy 22nd Birthday

今日就係 Ahiru No Pekkle 生日既大日子！

係 1990 年面世既 Pekkle，生於 1989 年 7 月 27 日，所以今日就係佢 22 歲既生日喇！

祝 Pekkle 永遠都咁得意同靚仔，鍾意佢既人越黎越多，fans 既人數直迫 Sanrio 大家姐 Hello Kitty！！

HAPPY BIRTHDAY TO PEKKLE!!!

Sanrio 夏日商品展銷會 2011

每年既暑假，Gift Gate 都會舉辦 "Sanrio Summer Carnival"，而選址就多數都係 Sogo 九樓，今年形式似乎唔同左，今次既活動係一連串去幾處地方擺 counter，而性質都似乎係主力 "去貨"，並唔似得以往咁，有 "散貨場" 之餘，都仲有好多遊戲區，仲會有 "最受歡迎 Sanrio 卡通人物選舉" 添！唔知今年仲會唔會呢個選舉呢？如果有，又唔知會係邊個場地舉行呢

根據過往既經驗所得，呢 d 所謂既『商品展銷會』多數都係買唔到 "心頭好"，一來 Pekkle 既貨品選擇一向都唔多；二來就算有，價錢都唔會平正價好多；三來，因為係『展銷會』既關係，既用唔到會員既折扣，就連會員消費既積分都儲唔到喎！好似有 d 得不償失囉....

所以，如果冇卡通人物選舉之類既特別節目，我唸我唔會去 lu.... 唔知有冇人去過岩岩完左既樂富『展銷會』呢？可唔可以話我知，今年呢個『展銷會』既形式係點既呢？

Manis 2011 catalogue

以往 Gift Gate 同 Manis 都係差唔多時間就會一齊出 catalogue，今年都唔例外，Gift Gate 係幾個星期前出左最新既 catalogue，Manis 係上星期都推出左佢地最新既 catalogue...

一如以往，有 d 貨品已經推出左，有 d 就仲未推出既....

已經推出既產品包括：

〔一〕紙扇，已經買左兩把...  唔睇 catalogue 都唔知，原來仲有布扇，布扇仲有個精美既布套，好靚喎！但係... 點解唔出埋 Pekkle 款呀？

〔二〕iPhone 套，我都已經買左一個！

〔三〕水樽，話左今年唔會再買水樽，所以如無意外，呢兩款都唔會買。

〔四〕化妝袋，呢款我都冇打算買。一來我從來都冇化妝品跟身，二來唔明點解化妝袋會用毛毛袋，Pekkle 仲要係白色添！一般黎講，化妝袋經常都要拎出拎入，又多數都要放係洗手間既檯面，白色加毛毛... 一 d 都唔襟污糟囉！而毛毛袋一向都係比較難清洗，真係唔明白佢地究竟有冇考慮過個實用性呢？

〔五〕雙拉鍊大網袋，呢個幾實用，而且用 donut 黎襯 Pekkle 都比較少見，話哂我就從來都未見會食 donut 既鴨仔既... 所以呢個我已經買左喇！

以下落黎既產品就應該係尚未推出既：

〔一〕造型筆袋，個人覺得 Gift Gate 個筆袋比較靚，應該會買 Gift Gate 果個既機會比較大，雖然我都係唔會用既...

〔二〕小童背包，造型係頭大身細既 Pekkle，都幾得意既，不過可以按得出 "Bi Bi" 聲既公仔袋，都唔難想像得到係幾咁 "小朋友".... 應該都唔會買 lu...

〔三〕手挽 tote bag，未見過 "真身"，好難判斷會唔會買，不過以 Manis 一向既 "作風"，呢 d tote bag 好多時都係過膠質地，如果真係既話，我唔買既成數都好高...

〔四〕又係出極都仲有既 card holder，今期有掛頸款同証件套款，粉藍色其實都幾吸引，奈何佢又用左我最憎既 "變形" Pekkle 樣，呢兩款都要睇過實物先決定買唔買...

而下面呢兩款，就係我既心水選擇，萬分期待見到佢地既 "真身"

我呢個 "雨遮屠夫" 並非浪得虛名，無論 Pekkle 出幾多款遮，我都有本事追得切，因為唔洗一個雨季，一定會比我整爛一把，所以... 『多 d 黎、密 d 手』...

Pekkle 拉尺呀！我最鍾意就係呢 d 又實用、又小巧既精品，齋睇 catalogue 都已經即刻想買喇！快 d 出啦...

同場加映：

其實平時我都會發現有 d 其他 Sanrio 公仔既 fans 係我既 blog 留言，而且大多數都係鍾意一 d 已經 "半退役" 既 Sanrio 公仔〔即係好似以前既 Pekkle 一樣，全靠鴨會社團既龍頭 Vi，Pekkle 先得以 "重見天日"〕。有見及此，我係度介紹一下 Manis 將會推出既系列 ---- 『Sanrio 經典卡通人物』既產品，連我以前鍾意既 TuxedoSam 都榜上有名喎！各位 Sanrio 經典卡通人物既 fans 們，敬請密切留意喇！！