當知道上星期舉行既一田購物優惠日有 Pekkle 雪絨毛印花毛氈賣，仲要只係 $299 就有兩張，仲要寫明只係限售 200 張時，相信所有鴨迷都 "蠢蠢欲動"，個個都想第一時間搶購到呢張 Pekkle 雪絨毛印花毛氈.... 當然我都唔例外啦... 
係一田購物優惠日既首日〔即係 26/5/2011〕，我冇聽 blog 友愛麗生既 "忠告"，並冇請假去買，唸住 lunch hour 落去，個減價都只係開始左三個鐘左右，點都應該有得剩卦？點知 lunch hour 去到，當然係空手而回啦！sales 姐姐話一早就已經賣哂，大概個零鐘頭就冇哂 d 鴨仔被！唔洗咁誇呀？！
問佢會唔會再番貨啦！佢就不置可否咁答：你星期六一早黎試下啦！不過我都唔知有冇嫁！可能有、可能冇，你即管試下啦！答得咁 "飄忽"... 咁即係點呀？
有冇留意，佢地將 Sanrio 呢個字串錯左呀！串成 "Sanior".... 好大意下喎！
好彩冇搞錯 Pekkle 個全名姐！
今次 promotion，原來係有四款公仔毛氈選擇，d 貨多到係疊到去天花咁高，無理由 Pekkle 會咁快賣哂囉！真係激死....
當知道冇哂 Pekkle 毛氈時，心情低落之餘仲忽然 "流浪漢" 上身咁，係個 counter 度兜黎兜去唔捨得走，就係兜兜下既過程之中，比我係地下發現左一箱毛氈，就係憑住突出既呢一小角既位置，就已經比我認出係 Pekkle 毛氈，趁個 sales 姐姐唔為意，立時影低張相，就算自己最終都係買唔到，都叫做有幅相留念下嘛....
乘人多混亂，拎左放係箱底既 Pekkle 被去箱面再影低佢！
影完相之後，就問位 sales 姐姐：呢 d Pekkle 毛氈係唔係可以買嫁？點知個 sales 姐姐就答我：呢 d 一早就比人買左嫁啦！等緊 d 客番黎拎貨嫁咋！
跟住聽到好多客問個 sales 姐姐可唔可以比定錢，到時有貨再 call 拎貨.... 又有客問可唔可以留電話，如果有貨番就通知.... 可惜一一都比呢位 sales 姐姐拒絕左！！
當我係個 counter "賴死唔走" 既過程之中，粗略估計，都見到大概每 10 個顧客，就有 9 個係想買 Pekkle 毛氈，估唔到 Pekkle 受歡迎成咁囉！
好 "落寞" 咁番到 office 之後，發現已經有 blog 友上左 blog，佢係經 "內部認購" 買到 Pekkle 毛氈，仲可以鋪埋張床，set 得靚靚咁 upload 上 blog，唔洗快成咁呀？！
好羨慕呀！
後來收到消息話大埔一田仲有貨，心情又再興奮起上黎，唸住放工即刻走去大埔買，點知都未夠一個鐘，呢個好消息又變成壞消息.... 大埔一田都已經賣哂！不過大埔一田既 sales 姐姐就肯幫客留電話通知，仲話星期六一定有貨番添，就係憑呢位 sales 姐姐既呢一句，鐵定星期六一早就走入大埔一田買 Pekkle 毛氈！
星期六未夠十點半就已經到達大埔，等到開舖時即刻走去 counter 問情況，sales 姐姐話仲未有貨番，不過可以先比錢留貨，貨到就 call 我去拎！聽到佢咁講，二話不說就拎張單去比錢啦！比完錢，sales 姐姐就話：可能今晚夜 d 會有貨番，不過都係聽朝穩陣 d，貨到再 call 你啦！... 當我係佢本 A5 note pad 留低資料時，發覺已經差唔多寫滿一頁紙既電話，全部都係留左 Pekkle 毛氈既，真犀利！
星期日又一早入到大埔一田，去到 counter 問貨，sales 姐姐話仲未番，應該五點零會有貨，貨到再 call。就係咁，係大埔遊下遊下咁等 call，三點幾終於都收到 sales 姐姐既電話，Pekkle 既毛氈終於都番左貨喇！
當我憑單取貨時，sales 姐姐話要幫我 mark 番個 record，但係就搵極都搵唔到我個名，原來，訂 Pekkle 毛氈既 list，已經由我買果日既一頁紙，變左兩頁半紙喇，厲害呀！！
拎住 Pekkle 毛氈係手超開心，真係好滿足呀！輕輕的、又柔軟，好舒服嫁！！
Product code 係 AP1101 呀！
鋪上床影唔到個效果，唯有掛起櫃門先影到，好靚呀！靚到唔捨得用囉！！
size : 140 x 200 cm、重量：300g
原來仲有一間叫 Smartech (HK) Limited 係拎左 Sanrio 既 licence 出 products 既！唔買呢張被都唔知添！
No comments:
Post a Comment