美心西餅 -- 魔鬼蛋糕

對於我地呢個冇乜人鍾意食蛋糕既家庭黎講，要『消滅』一個睇起上黎起碼有磅半以上既蛋糕，真係有 d 難度，不過我體內既 "朱古力魔鬼" 比一句『以 70% Valrhona 朱古力製成』既宣傳句語『喚醒』左，忍左個幾兩個星期之後，呢隻 "魔鬼" 始終都戰勝左理智，本著買左先算，唔理食唔食得哂既心態，終於都係前日買左黎食...

食野最緊要係味道，其次包裝都好重要，係未嚐呢個蛋糕之前，以價值而論，呢個包裝都算唔錯嫁喇！

唔知點解，天使蛋糕有對『天使翼』做 logo，魔鬼蛋糕就以對『蝙蝠翼』做 logo，唔知魔鬼同蝙蝠有咩關係呢

外型都算 ok 啦！其實除左個宣傳語句之外，呢個外型都係吸引我想試既原因之一...

呢盒係隨蛋糕附上既『魔法脆脆』，同之前美心出既天使蛋糕一樣，都係 gimmick 黎姐，講穿左咪係脆卜卜既糖粒，仲要係甜到漏果隻！係先要自己整碎，再灑係蛋糕上面食，但係當我用佢隨盒附上既膠棍企圖壓碎時，彈到一檯都係之後，結果仍然係無辦法將 d 糖粒整碎既....失敗！

切開左個樣都叫 ok 既，好有朱古力 feel 囉！不過一刀切下之時，都知知地出事嫁勒... 不過當時希望係自己估計錯誤啦！

上碟之後，加埋 d 整極都唔碎既糖粒，齋睇個樣都仲 ok 既，可惜一食就出事！對於我黎講，呢個蛋糕實在偏甜左 d，唔知係因為厚厚既朱古力 cream 累事，定係果 d『魔鬼脆脆』出事？總之食完呢一片之後，已經感覺到好膩... 雖然我唔多鍾意食蛋糕，不過係我心目既海棉蛋糕，應該係又鬆又軟，好有彈性，呢個蛋糕係呢方面既表現，明顯係差少少先合格，唯一既好處就係都算有香濃既朱古力味囉！當然，相比係食 Valrhona 既 plain dark chocolate，就算冇 70% 既濃度，都比呢個蛋糕更香濃囉！不過對於一 d 唔多喜歡略帶甘苦既 dark chocolate 味既人黎講，呢個蛋糕就岩岩好囉！ 

呢個蛋糕我結果要分三日，仲要撥開哂 d cream 先可以食得哂！最後一次食時，蛋糕既邊位已經開始變硬，口感比第一次食時仲要差 d...

百四蚊一個蛋糕都唔算貴，對於我呢個朱古力怪黎講，都叫做『完』左個心願啦！如果對於一 d 鍾意食朱古力，但又唔喜歡太濃可可味既人黎講，都可以一試既！