雖然我之前已經買咗好多 Pekkle 床品，但係今次 Pekkle 呢個造型非常之創新、獨特，忍唔住手唔買囉！不過我發覺喺唔同地方買嘅價錢都可以相差好遠下，所以有心想買嘅朋友，不妨細心格下價先好買喇！
床品都算係屬於耐用品，之前買落嘅款式都仲未用得哂，所以呢套床品都係唸住買嚟儲，唔打算用。亦都因為咁，都費時拆開嚟影，費時影完之後摺唔番咁好樣，就好難收藏...
單人冷氣被
冷氣被個 pattern 就係咁嘅樣，板仔 look 嘅 Pekkle 跳舞跳得幾咁開心~~
床品套裝，包括床笠、枕袋同埋被袋，雖然唔同嘅銷售點個價格都有啲出入，不過總括嚟講，就算係售價最貴嗰個價錢，都仲係比雅芳婷嘅價錢便宜。抵讚！
最開心就係 Uji 呢個系列，有我以前一路好想要，但係永遠都冇得散買嘅枕頭袋。之前雅芳婷出咗幾款 Pekkle 床品，都係冇得散買枕頭袋，對於我呢個有多個枕頭嘅人嚟講，冇得另外散買枕頭袋，係非常之唔方便。之前就曾經試過專登買多一套床笠，就係為咗多一個原裝枕袋，跟住再將張多餘嘅床笠拎去改衣店，叫佢地幫我『改裝』成兩、三個後備嘅枕袋，好唔方便。所以，今次 Uji 呢個系列可以另配原裝枕袋，真係令我超開心呀！希望將來 Pekkle 嘅床品都可以另配枕袋啦！
No comments:
Post a Comment