Pekkle 雅芳婷床品 2009

又再一次體現得到『眾志城城』既力量、『齊心就事成』既道理，經過一眾 Pekkle blog 友既 eamils 攻勢，雅芳婷終於都『順應民意』，係十三年後既今日再次令 Pekkle 床品復活喇！

幸得消息靈通既 Pekkle blog 友通風報訊，一早已經知道 10 月份雅芳婷就會推出全新 Pekkle 系列床品，可惜由 10 月 1 日開始每日往雅芳婷『尋鴨』都係失望而回，好彩之後又得另外一位 blog 友既通知，知道 Pekkle 床品上架日期係 10 月 30 日，正當疊埋心水等呢一日既來臨，點知已有 blog 友率先係 10 月 28 日買到，知道呢個消息時已經係 10 月 29 日既上晝，之後整天個心都記掛住鴨鴨床品，心不在焉，無心工作... 心中只係唸住想快 d 帶 Pekkle 番屋企...

記得對上一次買 Pekkle 雅芳婷床品已經係 1996 年既事，當時既設計係以啡紅色為主色，算係 Pekkle 產品系列之中比較少用既顏色；今次 2009 年既設計以 Pekkle 『專用色』--- 藍色為主色，雖然顏色上冇乜突破，但鮮明既藍色配襯住魔術師造型既 Pekkle，仍然係非常醒目、可愛！好靚呀！我好鍾意！

1996 年設計

2009 年設計

真係越睇越靚，從前買過一款 Pekkle 既冷氣多用被，所以一路以黎我只會買床笠、枕袋，從冇買過被袋，今次係我首次買既 Pekkle 被袋...

單人床笠既關係，枕袋只有一個，可惜我有兩個枕頭喎，點夠分呢？！希望雅芳婷會考慮推出埋 Pekkle 兩個裝既枕袋啦！

今日下晝知道其中一位 Pekkle blog 友竟然買到同款 4 呎長既 Pekkle 攬枕，實在太可愛喇！不過呢位 blog 友話要早前訂左床品既客人，先可以『有資格』買呢個攬枕.... 知道之後簡直覺得係匪夷所思呀！無理由雅芳婷有錢都唔賺喎，心唸放工去一田既雅芳婷睇下有冇貨先... 點知去到之後，發覺真係冇得賣喎！唔通真係唔會公開發售？即刻個心都沉左落黎... 不過岩岩又收到阿 Vi 既通知有攬枕！！睇黎聽日我又要趁假期出動『四出尋鴨』lu...

因為自己係 J Card 既會員，當然要支持番吉之島啦！所以一早都係唸住無論幾時出，都會留番假期去吉之島先買。不過估唔到鴨鴨係我心目中既地位比自己想像仲要高，當知道床品已經上左架之後，真係等多一日都嫌太耐，結果一放工就立即飛去一田入貨，點都要先買一套以慰『望穿秋水』之苦嘛....就好似驚死今日唔買，聽日就會比人買哂一樣！ 不過吉之島，你放心啦！我唔會離棄你既，一套床單又點會夠我用呃？你等我喇！