三木韓國料理

今日百無聊賴去左尖沙咀閒逛，唸起 blog 友介紹既韓國料理，擇日不如撞日，就係毫無預備之下走左去試...

之前 blog 友介紹左兩間韓國料理比我，仲叫我先試草苑，不過咁岩當時個天又落住幾密既雨，身處既地方又比較近三木，所以結果都係先試左三木...

好彩時間尚早，係冇訂檯既情況底下，我被安排左同一家三口既日本人同檯。當我仲係度研究緊食乜好時，已經見到好多人蜂擁而至，個個都好係似熟客，有香港人，亦都有韓國人，最奇連日本人都有！不過佢地到達後，都不約而同咁同一個貌似老闆娘，但係又操流利廣東話同韓文，身形比較胖既女士攀談。話咁快，成間三木已經坐滿客，門口仲企滿等位既人，因為我坐近櫃位，不時聽到果位肥女士講話 mark 錯 booking，搞到訂左位既客都冇位坐，好似好混亂咁喎....

終於唸掂食乜，呢位肥女士就好殷勤咁同我落 order，我只係叫到第二樣野，佢已經急不及待咁講：夠嫁啦！好多啦！..... 都好老實喎，唔會氹客人食多 d 野.... 呢樣野都抵讚既...

結果我叫左三樣野食：

第一樣上檯既，當然係前菜啦！有八〝小〞碟，其實相比起一般韓國菜館，都唔算〝小〞，都幾 ok 嫁喇！

跟住，第二樣上既就係韓式炒粉絲，原本唸住叫石頭飯既，不過因為 lunch 先食完石頭飯，所以結果都係叫左炒粉絲...

跟住上既係蛋包魚.... 其實我唔多食魚既，不過呢類煎香左，無骨既魚柳都勉強可以既，但係我估計佢包既魚..... 好似係三文魚黎嫁喎！有 d 怪怪地既感覺....

最後一樣係：炆牛肋骨，我覺得係三樣野食之中，最好食既一樣！

可能因為我唔係食烤肉啦，呢餐都係食左 $410，以韓國料理黎講，都唔算好貴！雖然訂座安排方面好似好烏龍咁，不過整體上，佢地位位既服務態度都好好！尤其係果位肥女士，真係好似〝肥姐〞二世咁，滿場飛周圍 social 兼落 order 之餘，都不忘掛住親切既笑容！呢樣野真係值得一讚！！