三寶之中，相信呢個小瓷碟連曲奇係最難搵嘅一寶，第一隻瓷碟都係全靠我朋友喺 17/4/2018〔公開發售前一日〕買到，到咗正式公開發售之日，我大大話話都行咗超過二十間七仔，次次都係空手而回，非常失望！好彩，後來知道星期六會再番第二輪貨，我都係全靠番第二輪貨時，先可以親手由七仔帶到鴨仔番屋企咋！
呢款小瓷碟連曲奇一共有十款 Sanrio 嘅公仔，就喺我行咗超過二十間七仔嘅『經歷』之中，我發覺最難搵到嘅就係 Pekkle。縱使見到貨架上推滿咗超過二十盒小瓷碟連曲奇，滿以為總有一盒會係 Pekkle，但係每次都係失望而回。就連比較罕有嘅 Pochacco，我都曾經見過三兩盒，唯獨 Pekkle 係每一次都冇辦法喺貨架上面搵得到... 所以，我有理由相信，Pekkle 根本係連『上架』嘅機會都冇，就已經被搶購一空，因為我自己買到嗰兩盒，正正都係靠七仔嘅店員拆箱，我直接喺個箱入面先可以搵得到！
得來不易嘅 Pekkle 小瓷碟，真係寧舍覺得靚！每盒有一隻小圓碟、一片曲奇餅，價值 $30，物超所值呀！
其實當我朋友幫我買到第一隻碟時，佢仲發現多一隻想幫我買埋嘅，但係因為瑕疵嘅關係我冇買到。因為我以為自己可以好易買得到，不過當我行咗超過二十間七仔都仲未買到時，我係有番轉頭去番呢間七仔，唸住就算有瑕疵，都叫做係親手買到，叫做有交代。點知，萬萬估唔到，連呢隻多咗兩粒癦嘅 Pekkle 碟都比人掃埋，唔知邊個 Pekkle fans，連『大粒癦 Pekkle』都唔放過呢？😁
唔知係咪我地 Pekkle fans 人多勢眾又太過煩呢？我覺得今次推出 Pekkle 產品，七仔嘅店員冇之前咁有誠意幫我地搵，除咗好多間都堅持明明有貨，都一定要等到 18/4/2018 先開箱發售之外，當我每次搵唔到再問有冇貨或會唔會再番貨時，佢地都係冷冷咁回應：『擺哂出嚟啦！有就有，冇就冇！』
所以，我好感謝我買到兩盒嗰間七仔店員，佢係專登拆箱幫我搵 Pekkle 嫁！全賴有你！
No comments:
Post a Comment