跟往年一樣，趁 lunch hour 走一轉，睇下有冇咩筍貨，兼睇一睇個人流。因為自從沙田一田收番新城市第三期幾層商舖位置，進行大規模嘅翻新工程之後，一田購物優惠日並無以往萬人空巷嘅墟冚情況，仲記得今年五月嗰次一田購物優惠日，唔單只冇乜人排隊比錢，某一、兩個較隱閉嘅收銀處，更加係唔洗排隊就可以直接付款，就連一向出哂名要排長龍嘅超級市場，都容易買嘢咗好多...
但係唔知點解，今日嘅情況又唔同哂，回復番以往嘅人山人海嘅狀況，就算未回復十足，都有八、九成...
因為食晏時間有限，只係夠時間比我睇一轉睡衣部，因為今朝 FB 又有人報料，話今日限定品，有兩款 Pekkle 睡衣，其中一款係之前網上店預售冇嘅款式。
所以『目標為本』嘅我，二話不說第一站就去睡衣部搵下 Pekkle 睡衣，確定咗係 2017 年新款，又同 eshop 預售嘅款式唔同，即刻就買咗一套，價錢仲要比另外一款更平！eshop 款式喺門市嘅售價係 $430 兩套，$239 一套〔網上預售價為 $175 一套〕，而我依家買呢款，就係 $350 兩套，$199 一套。
全套睡衣 Pekkle 一共有四個不同嘅造型 -
踢足球
打籃球
踩 roller
踩滑板
仲有唔少得 Pekkle 嘅全名同佢三條魚仔死黨... Pitchi、Chap 同埋 Ran
整體上〔款式、質料、顏色同埋價格〕，呢套睡衣都算係中上之選。😊
No comments:
Post a Comment