今年香港嘅投票活動有別於以往，信和集團搞咗一個『好奇怪』嘅宣傳活動，唔知係唔係同瑞華行合作嘅呢？喺多個信和集團旗下嘅商場，均擺設咗 Sanrio 卡通人物選舉嘅宣傳品。而我之所以話呢個宣傳活動『好奇怪』，係因為 --
一〕有別於 Sanrio 以往喺唔同商場所舉行嘅宣傳活動，通常同得 Sanrio 合作，一定會有鋪天蓋地嘅廣告宣傳。而今次活動牽涉咗多個信和集團旗下嘅商場，既有重點商場，亦都有較二、三線嘅商場，其實都可以算係『大型宣傳活動』，但係偏偏報紙、雜誌、電台、電視均不見其宣傳廣告...
二〕同得 Sanrio 合作，一定會吸引到唔少 fans，所以通常商場都會借勢宣傳，推出一系列限量紀念品 / 非賣品，要顧客喺商場消費，就可以換到限量版紀念品，以圖增加商戶收益及商場人流，但係今次冇...
三〕一般商場有咩特別推廣活動，就算冇其他媒體廣告都好，商場本身都會印一啲宣傳單張，又或者將整個商場佈置到每一個角落都見到有關嘅宣傳品，可惜，呢樣都係欠奉，每個商場就只得一個大紙板同埋其中幾位 Sanrio 公仔嘅紙板公仔...
就係因為呢幾點，我就覺得呢個宣傳活動『好奇怪』囉... 不過唔理咁多啦，我只關心我嘅頭號至愛公仔 -- Pekkle 嘅姐... 由於冇宣傳廣告，我自己又冇玩開 facebook，差啲就『走漏』咗呢個活動。好彩，有朋友通知我，話 facebook 有人報料，喺粉嶺一個屋苑嘅商場發現到 Pekkle 嘅『蹤影』... 就趁五一勞動節假期走一轉，去探下 Pekkle 喇！
人生路不熟嘅情況之下，去到粉嶺呢個屋苑，環境同規模都比我想像之中遜色，商場只係得兩層，店舖數目都有限，而且都比較殘舊，咁啱當日又有慈善團體擺 counter 宣傳暑假活動，所以商場三份之二嘅位置都比個慈善團體用咗，我搵咗好耐都見唔到 Pekkle，以為宣傳已經完咗，好失望之際，上咗二樓商場，唸住佔有『居高臨下』嘅有利位置，作最後一次嘅『搜查』啦... 就係咁，皇天不負有心人，終於比我喺電梯底嘅位置搵到 Pekkle 喇！梗係第一時間落番地下影相啦！^^
整個商場，一眼睇哂，就只係得呢兩個宣傳品，一塊大嘅佈景板，另加卡通人物紙板公仔，而呢個商場嘅『宣傳大使』，就係 Pekkle、Pochacco 同埋水怪...
著咗白色背心嘅 Pekkle 真係太得意喇，不過信和好似抄咗上個月嗰期草莓雜誌封面嘅 Pekkle 造型咁喎，上期 Pekkle 又係著住白色小背心，只係冇咗頭頂嘅『草圈』頭飾... 我真係好想拎走 Pekkle 番屋企呀！
背板上有人物介紹，可惜比擺咗喺前面嘅 Pekkle 紙板公仔遮住咗，所以影得唔係太清楚，想搬開個紙板公仔影，但係又驚比管理員鬧〔因為擺放紙板嘅位置，就正正係商場管理處對面〕，而且個紙板公仔都幾重下，所以最終都係冇移開到個紙板公仔，就咁影咗張『四六面』就算數喇！=P
雖然唔知呢個 QR Code 係唔係真係 work，不過見到中間位置印咗 Pekkle 個『嘜頭』係度，都幾認真咁喎...
呢句就係我心底入面嘅說話！=D
不過心水清嘅 Pekkle fans，唔知有冇發覺呢個 Pekkle 有咩問題呢？雖然佢地嘅製作都算幾認真、幾精美，可惜偏偏就犯咗一個『低級錯誤』... 正版 Pekkle 咀部嘅 outline，兩邊咀角位置係唔會黐埋嫁，大家可以拎番 Pekkle 嘅精品出嚟對比一下啦！^^
No comments:
Post a Comment