Pekkle 科學瓷餐具 - 上集

相信有玩開面書嘅 Pekkle fans，對呢套餐具一啲都唔陌生，由於我冇面書戶口，每次都係靠朋友通知，所以當我知道時，可能都已經係隔左好幾日之後嘅事喇。所以每當我嘗試跟住面書上面嘅『情報』去搵時，都因為賣呢套餐具嘅舖頭 / 檔口仔，多數都係一啲短期租約，而令我每次都係撲個空，失望而回... :(

刻意去搵搵唔到，反而無心插柳，又比我擁有一套，雖然呢套餐具並唔齊全〔因為根據面書上嘅相片所示，全套餐具應該有十四件，如今我就只有其中九件〕，但係我已經好滿足嫁喇！



平邊圓碟



小方碟



小托盤，面書上嘅照片中，應該仲有另外一款大托盤。



兜形圓碟



水杯。喺面書嘅相片中可以見到仲有一款連蓋嘅水杯。



大碗連蓋，應該啱啱好可以焗到一個即食麵咁上下嘅大細。而喺面書嘅相片中顯示，另外仲有一個好大嘅湯碗。



飯碗。仲有一款大少少嘅碗〔定係細少少呢？因為個圖案係完全一樣，單靠睇相，係分辨唔到邊個係細碗、邊個係大碗〕。



餐匙



呢套餐具，似乎令到面書一眾 Pekkle fans 都瘋狂咗一陣，唔知當中又有幾多位 Pekkle fans 記得好多年前嘅呢一套 Pekkle 餐具呢？呢套係正宗日貨，無論餐具嘅質素同埋印製 Pekkle  嘅精美度，當然係比上面香港嗰套好好多啦，但係價錢就真係天壤之別喇！所以兩套餐具，各有長處，作為 Pekkle fans 嘅我，最開心就梗係兩套都可以集齊啦！^^

http://www.pekkle.hk/2010/12/pekkle-2010.html

Sanrio characters 鐵筆盒

呢個鐵筆盒其實係 2015 年嘅產物，當時都推出咗一系列嘅產品，包括鉛芯筆、note book、擦膠、鐵筆盒等等。而之前喺香港嘅 Gift Gate 只有部份產品出售，有啲產品冇 Pekkle 份冇買，note book 就買咗，而呢個鐵筆盒我之前只係喺 facebook 見有人 post 過，未見過實物，難得最近家人去日本旅行，話無意之中喺一間文具店發現，見只係剩番一個，所以喺唔知我有冇買到嘅情況之下，都買咗番嚟比我先，正！




Pekkle 大特寫 :)

 

雖然都係 "Made in Japan"，不過寫到明係 "For sale in Japan only"，已經值回票價啦！

草莓雜誌 - 2016 年 5 月號

上個月10號出版嘅草莓雜誌，因為係宣傳最受歡迎卡通人物選舉，所以 Pekkle 又有幸『榜上有名』，可以做到 cover boy... =)

雖然只係佔一小角位置，但係 Pekkle 咁叻仔可以做到 cover boy，點可以唔撐呀？仲好例外地以贈品冇 Pekkle 份都一樣買咗兩本...

2016 年最受歡迎卡通人物選舉 - 粉嶺碧湖商場

日本 Sanrio 同埋台灣三麗鷗官網，年年都會舉辦 Sanrio 卡通人物選舉，而香港嘅總代理瑞華行 (Daniel & Co.) 旗下嘅 Gift Gate 每年都會喺差唔多既時候，舉辦同類型嘅投票。佢地之間最大嘅分別係在於日本同台灣可以喺網上投票，係屬於『無料』選舉，但係香港就要去 Gift Gate 購物之後，先有『資格』投票囉...

今年香港嘅投票活動有別於以往，信和集團搞咗一個『好奇怪』嘅宣傳活動，唔知係唔係同瑞華行合作嘅呢？喺多個信和集團旗下嘅商場，均擺設咗 Sanrio 卡通人物選舉嘅宣傳品。而我之所以話呢個宣傳活動『好奇怪』，係因為 --

一〕有別於 Sanrio 以往喺唔同商場所舉行嘅宣傳活動，通常同得 Sanrio 合作，一定會有鋪天蓋地嘅廣告宣傳。而今次活動牽涉咗多個信和集團旗下嘅商場，既有重點商場，亦都有較二、三線嘅商場，其實都可以算係『大型宣傳活動』，但係偏偏報紙、雜誌、電台、電視均不見其宣傳廣告...

二〕同得 Sanrio 合作，一定會吸引到唔少 fans，所以通常商場都會借勢宣傳，推出一系列限量紀念品 / 非賣品，要顧客喺商場消費，就可以換到限量版紀念品，以圖增加商戶收益及商場人流，但係今次冇...

三〕一般商場有咩特別推廣活動，就算冇其他媒體廣告都好，商場本身都會印一啲宣傳單張，又或者將整個商場佈置到每一個角落都見到有關嘅宣傳品，可惜，呢樣都係欠奉，每個商場就只得一個大紙板同埋其中幾位 Sanrio 公仔嘅紙板公仔...

就係因為呢幾點，我就覺得呢個宣傳活動『好奇怪』囉... 不過唔理咁多啦，我只關心我嘅頭號至愛公仔 -- Pekkle 嘅姐... 由於冇宣傳廣告，我自己又冇玩開 facebook，差啲就『走漏』咗呢個活動。好彩，有朋友通知我，話 facebook 有人報料，喺粉嶺一個屋苑嘅商場發現到 Pekkle 嘅『蹤影』... 就趁五一勞動節假期走一轉，去探下 Pekkle 喇！

人生路不熟嘅情況之下，去到粉嶺呢個屋苑，環境同規模都比我想像之中遜色，商場只係得兩層，店舖數目都有限，而且都比較殘舊，咁啱當日又有慈善團體擺 counter 宣傳暑假活動，所以商場三份之二嘅位置都比個慈善團體用咗，我搵咗好耐都見唔到 Pekkle，以為宣傳已經完咗，好失望之際，上咗二樓商場，唸住佔有『居高臨下』嘅有利位置，作最後一次嘅『搜查』啦... 就係咁，皇天不負有心人，終於比我喺電梯底嘅位置搵到 Pekkle 喇！梗係第一時間落番地下影相啦！^^

整個商場，一眼睇哂，就只係得呢兩個宣傳品，一塊大嘅佈景板，另加卡通人物紙板公仔，而呢個商場嘅『宣傳大使』，就係 Pekkle、Pochacco 同埋水怪...