萬綠叢中一點紅的 Pekkle 餐墊

一向以黎，綠色係極少出現係 Pekkle 既產品上面，所以今次呢款新出既餐墊算係一個『突破』，整個設計都係以綠色為主，老實講我唔係太喜歡綠色，不過當離遠見到呢系列既餐墊擺係貨架上時，『萬綠叢中一點紅』既 Pekkle 餐墊，即時變得係最 sharp、最靚果款！

一包兩張餐墊，只賣十幾蚊，平均一張都唔洗十蚊，好抵呀！

明明呢堆就係青檸，但係唔知點解，我覺得有幾個青檸畫到好似啤梨咁，唔知有冇人有同感呢？

Pekkle 八達通卡套

最新出品 --- 八達通 / 記憶卡儲存套

好靚仔既設計呀！ 我覺得今次 Daniel & Co. 既設計幾得意，全線幾款公仔既儲存套，都係以銀行信用卡作為藍本，而戴住 bow tie、著住吊帶褲、手拎住錢袋既 Pekkle 呢，成個財爺咁款呀！ 有冇留意呢張『信用卡』既卡號呀？係 “1990 0727 0727 0727”... 呢堆數字對一般人黎講，當然冇乜特別意思，但係對我地一班 Pekkle fans 黎講，就一定唔會陌生啦！係咪？

呢個八達通卡套既質地好得意，應該都係膠既一種，而且睇起上黎就好似有 d 金粉咁閃令令，不過摸上手時既感覺.... 唔識得點形容，同一般既膠質地唔同，都幾特別既！最緊要係價錢唔貴，所以一次過就買左三個！

Pekkle 大、小匙羹〔更新於3月6日〕

因為要等保溫杯有貨既關係，所以又係遲遲未買呢隻 Pekkle 匙羹，可惜當等到有一間 Gift Gate 有齊兩款保溫杯時，又輪到 d 匙羹賣哂喎！唔通 Pekkle 真係咁受歡迎？！

由於已經同 Gift Gate 既 sales check 埋貨，知道全港都係得番兩、三間 Gift Gate 有大匙羹現貨，唯有唔理咁多，細匙羹都買左先啦....

可愛小 win win 講得岩，呢隻匙羹既 design 真係冇乜 heart，完全冇特式，亦都冇驚喜！屋企又唔會用科學瓷既匙羹.... 雖然係咁，可能係價錢平既關係，結果我都係不自覺咁買左 3 隻...

唔知幾時先可以買埋款大既匙羹呢

後記〔3月6日更新〕

經確認全線 Gift Gate 都已經冇哂有鈎既大匙羹之後，唯有出去旺角女人街既精品店入貨，終於都買齊兩款喇！

Pekkle Plastic Folder

Gift Gate 一次過出左兩款有 Pekkle 份既 folder，一款係千呼萬喚始出來既 50 周年 plastic folder，而另一款係 "意料之外" 既....

兩款 folders 既前幅

後幅

太空造型既 Pekkle.... 有新衫著既 Pekkle 份外唔同 d 既....

zoom 近後幅.... Pekkle 坐左係類似地球既 "物體" 上面，仲要吊住左 Pichi 添，不過點解 Pichi 個樣咁無奈既？唔通要同 Pekkle share 一個氧氣好辛苦？

依然係 50 周年既 "官方 icon"，冇乜驚喜... 不過實在係等得太耐，所以見到都係忍唔住買番個黎儲...

又係用放大鏡先會見到既 "飛天 Pekkle"....

個背面都有 Hello Kitty、XO、大口仔、水怪、Kerokerokeroppi、CK 鼠、Pochacco 同埋馬騮仔既 outline，都幾靚既.... 但係如果有埋 Pekkle 就更加 perfect 喇！

一如檸茶話齋，呢次推出既 folder 比以往既貴，可能係因為有閃粉點綴既關係卦？撇開價錢唔講，其實我寧願唔要閃粉囉.... 略嫌太搶同太誇，都唔岩平時用，所以都係每款只買左一個，純粹用黎儲...