日本 Sanrio 2012 年最受歡迎卡通人物選舉 - 最後更新

如果你係 Pekkle fans 既話，一定唔會唔知今日係咩日子啦？無錯喇！今日就係 Pekkle 23 歲生日既大日子喇！

係呢個大日子裡面，承蒙一班 Pekkle fans 既厚愛，Pekkle 不負眾望，係『日本 Sanrio 2012 年最受歡迎卡通人物選舉』中，再攀升多 3 位去到第 13 名，比去年既總成績仲要升左 2 級嫁！

今日已經係揭曉選舉最終成績前既最後一次更新，雖然唔知 Pekkle 係餘下呢半個多月時間既成績會變成點，我亦唔奢望 Pekkle 可以打入十大位置，但都希望佢可以保持到呢個佳績，直到截止投票日期為止啦！

上星期五排名榜〔截止 7 月 20 日〕

比之前既第 18 名升左 2 級去到第 16 位

今個星期五排名榜 - 最後一次更新〔截止 7 月 27 日〕

今日最新排名係第 13 位，比上星期五既成績，再攀升多 3 級

今日既係 Pekkle 既生日，亦都係 Pekkle 有史以黎，登上排名榜最高位置既一日，真係『雙喜臨門』呀！恭喜哂 Pekkle！

Pekkle 袋

既可當作筆袋，又可以當係化妝袋...

正面，係以牛仔褲褲頭既概念去設計。其實我唔係幾鍾意呢款『擰轉頭』造型既 Pekkle，因為成日都搞到 Pekkle 既頭同身比例有 d 問題咁...

背面，魚仔都有份，仲有，終於都冇串錯 Pekkle 個全名，都幾靚既...

內籠都幾大，而且有兩格內袋，底部有闊度，應該都可以裝得幾多野，岩哂我呢個成日要帶咁多『垃圾』出街既人...

袋入面既 product tag 都印左 Pekkle 個嘜頭嫁...

化妝品我就冇喇，不過平時都會有好多『濕星野』要帶出街，例如各款會員卡、印花、折扣卷、現金卷等等，有左呢個袋，就可以齊齊整整袋好一袋跟身喇！

日本 Sanrio 2012 年最受歡迎卡通人物選舉 - 選情走勢

又到星期五睇投票走勢既時間喇... 今個星期 Pekkle 既票數都有所增長既，可惜名次就冇升跌，依然係排第 18 名...

頭三甲既位置都仍然係一樣！

Hello Kitty、My Melody 同埋 Little Twin Stars 由頭帶到尾係三甲位置，繼續遙遙領先係可以理解，亦都心服口服既... 但係環顧番頭十名既排位，有一位卡通人物可以入到十大，真係搔爆頭都唔明，完全係唔識，亦都鮮有見過佢既產品... 連個名都好陌生囉...

呢個 "Go Chan" 熊貓唔似熊貓、貓又唔似貓、熊仔又唔似熊仔既『三不像』，點解會咁有本事入到十大位置？會唔會係因為佢係 2011 年既產物，所以得到 Sanrio "眷顧"、重點推介，所以可以名列前茅？咁呢個卡通人物選舉其實有冇造馬成份嫁？

Manis 2012 Summer catalogue

正如我之前所講，同 Gift Gate 一樣，今年 Manis 都係冇乜 Pekkle 新貨，所以可作介紹既新產品不多....

成個書包咁大個既背囊，仲話係『輕便系列』喎，一 d 都唔岩我呢個上左年紀既 fans 用，即係慳番唔洗買.... 其實 Manis 過往幫好多 Sanrio 卡通人物出過環保袋，但係偏偏就係冇 Pekkle 份，老實講，我覺得 Manis 既環保袋，無論係質料上、款式上，或是實用度，都係比 Gift Gate 既環保袋優勝，但係唔明白點解咁耐都冇幫 Pekkle 推出環保袋，背囊反而出過好幾款，對於我地呢 d 已經離開左校園生活好一段日子既 fans 黎講，書包型既背囊真係唔多實用囉....
  



多用途袋，質地應該類似之前出過既眼鏡袋，只係 pattern 唔同，冇乜特別。

鬧鐘 -- 八首音樂鈴聲響鬧、重響功能、LED 夜光同埋超靜音掃秒機芯〔一句講哂，即係唔會『滴滴答答』囉！〕。大家都係鐘一個，我反而覺得之前推出有埋萬年曆既跳字鬧鐘仲好 d，起碼冇咁大個，而且又有埋日曆功能，好似好用 d... 所以之前嗰個我一次過就買左兩個，不過依家睇到佢劈價清貨，即刻有 d 肉痛...

今次呢本 catalogue 有一個小小既 "Pekkle corner"，show 哂 Pekkle 既新貨出黎，睇一睇，都冇乜野係想好買嫁喎...

Sanrio 2012 Summer catalogue

Pekkle 新貨近兩、三年間進行左一連串密集式『攻擊』，搞到我地一班 Pekkle fans『遍體鱗傷』之後，最近情況似乎稍為緩和...

剛過去既個幾星期，Sanrio Gift Gate 同 Manis 分別都印製左最新一期產品目錄，目錄內雖然仍有一部份 Pekkle 產品，不過當中有好多產品一早都已經推出左，所以睇完兩本目錄都冇乜驚喜，而今次我亦只會介紹將會推出既新產品，已推出左既都無謂再多作介紹。

A4 文件夾，打鼓打到個鼓都爛埋，仲要比個『爛鼓』夾住左既 Pekkle，唔上唔落、狼狼狽狽咁，都幾得意喎...

A4 雙層文件夾，一共有兩款，上面嗰款既 Pekkle 拎住條『救火喉』玩水，論論盡盡既仆倒造型，雖然係冇乜新意，但勝在一個 folder 有三個 Pekkle 公仔，以多取勝！至於下面嗰款係舊款，冇乜特別。

1.2 公升水瓶，又一實用家居用品，雖然個形狀有 d 『怪異』，不過只要呢個水瓶係可以裝到熱水既話，呢個將會係今期目錄內我一定會買既新產品！

熟悉我既人都知，我有個外號叫『雨遮屠夫』，過往『死』係我手上既 Pekkle 雨遮不計其數，再加上今年呢款遮既 pattern 唔會太過 childish，所以呢樣新產品將會係我第二樣既 "must buy items"...

LED 型格手錶，又跳字、又鏡面咁，睇幅圖仲似乎係膠錶帶，呢個要視乎實物靚唔靚，同埋價錢先貴唔貴，先決定會唔會買。

整本 catalogue 就只有以上既新產品，其餘都係已經推出既舊款，可以不提。

唔通人都係犯賤？之前兩、三年當我見到琳瑯滿目既新貨目錄時，總係『叫苦連天』，唸住又要『大出血』，到今次冇乜驚喜，終於都可以有『喘息』既機會時，又即刻嫌棄... 我發覺自己都相當難服侍...

日本 Sanrio 2012 年最受歡迎卡通人物選舉 - 選情走勢

上個星期五 Sanrio 日本官方網頁再次更新本年度最受歡迎卡通人物選舉既選情走勢，Pekkle 既排名由 6 月 29 號中期報告中既第 22 位，擢升 4 級至第 18 位；而得票總數就係一個星期之內，由上次公佈既 4,831 票飊升至 9,195 票，上升左足足 90.33%！！

 

雖然 Pekkle 所得既票數都未及第 1 位 Hello Kitty 總票數既『零頭位』，不過 Hello Kitty 係呢個星期總票數既升幅只有不足三成，單以百分比計算，Pekkle 已經贏左九條街啦！

我並冇詳細咁研究過上星期一百位既位置升幅，不過照估計以 Pekkle 單單係一個星期之內，總票數多左接近 4,400 票，百份比有接近三位數既增幅而言，簡直就係奇蹟！所以如果有『最佳進步獎』既話，相信都一定會係 Pekkle 囊中之物...

睇個走勢，Pekkle 要保得住上年既位置，問題應該唔大.... 當然，Pekkle 可以有咁既佳績，實有賴各方友好既通力合作，今次大家都要比個『叻』自己喇！

日本 Sanrio 2012 年最受歡迎卡通人物選舉 - 告急！！

日本 Sanrio 2012 年最受歡迎卡通人物選舉首次推出既中期報告已於 6 月29 日發表，我呢 d "die hard fans" 梗係一早 mark 定日曆，睇下至愛既 Pekkle 排第幾位啦！

所謂既中期報告，咪即係投票走勢，就好似我地投票日必有既『票站調查』一樣，比個數字班 fans 睇下，等大家心中有數，睇住個走勢去投票。雖然每年呢個選舉我覺得點都有 d 『黑箱作業』〔因為Pekkle 次次都入唔到十大〕，但係比起以前由投票開始到結束，完全『無聲無色』就公布左個賽果，感覺上個透明度係高左 d 既...

當日去到網站，都搵左一陣先可以睇到個結果係邊，最初只係睇到頭十名既排位，搵唔到 Pekkle，個心都涼左一截，後來發現原來個排位係 1- 100 都有列出，再搵下，先發現到 Pekkle 位處二十二... 比前兩年既成績都差左呀！

截至 6 月 20 號，Pekkle 共得票數係 4,831 票，與排第一位既 Hello Kitty 相差左 56,680 票呀！！所以，我依家都要學下 d 政黨人士咁樣發出『告急』牌，依家距離投票截止日期尚餘 48 日，希望各 Pekkle fans 能夠好好利用餘下既時間，踴躍去投票。








我並唔奢望 Pekkle 能夠係短短既日子裡面，取多十萬八萬票而擠身三甲位置，只希望 Pekkle 能夠力保上年第十五名既位置都已經心滿意足，當然能夠打入十強就更加美滿啦！要成就呢件美事，單憑我個人既力量就真係冇乜可能，所以希望大家都能共同努力喇！

根據網頁表示，係 7 月 6 號〔今個星期五〕會再發出一份最新排名表，希望到時會睇到 Pekkle 已經從後趕上，排名第 15 或以上啦！