Pekkle note pad〔細〕

最新推出既 Pekkle note pad，尺寸約為 4" x 6"，一本共有三款唔同既設計，用色及設計都好奪目，紙質又唔錯、價錢又唔貴，可以拎番公司當 memo 紙用，正！

 

著住工人衭既 Pekkle 幾醒目！

 

 

呢款設計既 Pekkle 就好似比一個超大碼既夾公仔機夾住左咁。

 

糖果機做背景，色彩繽紛。



呢本 note pad 係 Ellon 既出品，無論係設計或者價錢方面都好好，唯一美中不足既地方，就係好似上次個有耳玻璃杯一樣，印錯左 Pekkle 個名，名咁重要都可以印錯，Ellon 既  design team 同 QC 都真係要好好檢討一下先得喇！

Pekkle 保溫壺〔細〕

一連推出一大一細既保溫壺，兩個之中，pattern 同顏色都係細呢個比較好，不過容量實在太細冇乜用囉！

唔知係唔係因為細 size、pattern 又簡單 d，所以『出錯』既機會少 d 呢？呢個細保溫壺既印刷效果比大嗰個好好多，連個蓋都冇問題呀...   拉上補下，買左個問題多多既大保溫壺，再買番個好樣既細 size，阿 Q 講句，當係個打個和啦！

 

Pekkle 保溫壺〔大〕

繼上年推出既保溫杯之後，今年就推出左新既保溫壺，我覺得好實用，可惜印刷及手工都好有問題，我去左幾間 Gift Gate、揀左無數咁多個暖水壺，都冇辦法搵到一個手工同印刷印得好既保溫壺，結果有瑕疵既都照買，唯有安慰自己，就算買到個完美既，日日拎黎用既話，都會好快就整花啦...

其實個保溫壺真係好靚，可惜手工就認真麻麻地喇！

好明顯既瑕疵位：上左色既地方，唔係印花左，就係刮花左、甩左色...

成個圖印歪左，仲印到『出哂界』添...

已經用左兩個星期，發覺除左印功差之外，手工質素都好差，因為個蓋係唔岩位，扭實左之後，係高、低不平，如果要就番個位既話，個蓋就會合唔實，d 水就好易流出黎... 唉，掛住檢查有冇花，就遺漏左試下個蓋，千揀萬揀、揀著個爛燈盞，依家個暖水壺係個『look』又唔掂、個蓋又唔掂！好彩... 個保暖功能都尚算唔錯既，總好過一無是處！唯有咁樣安慰下自己啦！

未買而又打算買既『同好』記住留意啦！除左要檢查好個外殼之外，個蓋都好重要嫁！

Pekkle 鏡盒〔大〕

之前只係買到細鏡盒，後來終於都買埋大呢個，我覺得兩個之間，都係大呢個既圖案比較靚，不過鏡盒對於我黎講係冇乜實際用途，所以都純粹係買黎儲既姐...

Pekkle 紙巾筒

係 Gift Gate 2011 Winter calalogue入面見到 Pekkle 將會推出紙巾盒套，點知等到依家都仲未見影，反而 Gift Gate 既死對頭 Manis，係 1 月中就搶先推出左呢個 Pekkle 紙巾套。

 

其實紙巾套對我黎講就冇乜實際用途，因為屋企同公司都係用盒裝紙巾，不過我覺得呢個紙巾套以呢個價錢，算係有交代，構圖精美，手工都算細緻，質地係仿皮既膠，又有拉鍊封口，唔似得一般既紙巾套有窿易藏塵，整體黎講，都算係唔錯嫁！