懷舊玩具精品店

多謝幾位 Pekkle blog 友介紹，趁今日唔洗番工，拿拿聲走去睇下呢間懷舊玩具精品店仲有冇貨剩...

係朗豪坊睇完戲之後，去到目的地都已經四點左右，心唸應該都開左門唔洗摸門釘卦？去到第一間對正扶手電梯既鋪頭，見佢掛左〝休息〞牌，個心當堂冷左一截... 行過幾間，又係掛住〝休息〞牌....個心係度唸：唔係下化？天悅事件又再發生？唔通我同 d 精品店真係唔夾八字？！

呢個時候，見到其中一間店鋪門口企住一位伯伯，記起 blog 友們都提過呢間鋪有一位伯伯同後生 d 既男人，於是膽粗粗走埋位伯伯度....

我問：請問個鴨仔公文袋幾多錢呀？

呢位伯伯答我：廿蚊啦！

心唸，乜唔係十蚊一個咩？blog 友好似都係買十蚊一個咋喎.... 就係呢個時候，有位男士拎住一大袋貨係鋪頭行出黎，好似要同一個訂左貨既顧客交收，我就趁機想行入間鋪，點知呢位伯伯就同我講：唔好意思呀！岩岩番左貨 check 緊，唔入得去住，你想買咩呀？...... 係冇得睇住黎買既情況下，唯有只係指出想買貼係門口既公文袋同貼紙....

等呀等，等呀等，我唸都等左有十幾分鐘，個位伯伯見我仲等緊，就推門通知係鋪入面另外一位『職員』，話我已經等左好耐，另外一位『職員』行出黎同我講：不如你轉頭再黎過啦！咦....呢位又係一位伯伯喎，究竟係邊位伯伯先係 blog 友口中既『好人』呢？

我問佢：咁要我幾耐之後先番黎呀？

呢位伯伯望一望錶、再望一望 d 貨，就問我：你要 d 乜？一係我依家執比你啦！

我問呢位伯伯：鴨仔公文袋幾錢個呀？

伯伯答：十蚊一個...

咦，價錢中左喎！唔通呢位伯伯先係傳聞中既『好人』？ 跟住我就憑依稀既記憶，將各 blog 友買左既鴨仔 products，嘗試逐樣講番出黎。講講下，呢位伯伯已經對我講：哦，我知你要 d 咩喇！單憑呢一句，就知呢位伯伯就係 blog 友口中既『好人』，亦憑佢呢一句，知道我地 Pekkle fans 又發揮左強大既威力喇！一定係先後好多 blog 友去買過相同貨品，所以呢位伯伯先咁記得我地啦.....

唔講咁多，睇下我買左 d 乜啦！

1992 年出既鐵罐〔$38〕....

1993 年出既公文袋〔$10〕，其實幾年前係集成中心都見過，不過當時怕整皺冇買到，再去時已經唔見左，好彩依家買得番....

1992 年出既 Sanrio characters 貼紙〔$20〕...

1993 年出既生日卡〔@ $10〕...

1991 年 Pekkle 沙畫〔$30〕...

1992 年出既文件夾〔@ $20〕！呢個好可愛呀！之前係其他 blog 見過已經超想要，不過後來知道佢地唔係上網 bid，就係 last 一個，當時都好失望。估唔到依家比我遇到佢，真係好開心！所以一買就買左三個！

呢兩張唔係買既，係呢位好人伯伯送既！仲要係我已經比哂錢，準備走時，佢叫住我：唔好走住，有 d 野送比你嫁！跟住佢走番入鋪頭搵呀搵，終於都摷到呢兩張卡仔比我喇！

雖然最終我都係冇得入鋪睇，唔知有冇漏網之魚，不過對於呢位伯伯穿梭於三間鋪頭之間，又開門又鎖門咁執齊以上既貨比我，搞到呢位伯伯咁頻撲，我都覺得有 d 唔好意思。不過呢種服務態度令我好滿意，買得好開心！呢位伯伯果然係一位好人！

李克勤靚聲音樂會

尋晚六點剛剛掛左八號風球，仲擔心緊今晚既 concert 會唔會取消，點知個風球只係掛左十二個半鐘，唔單只 concert 照睇、連工都要照番.... 今個風球真係一刻假期都冇得賺...

係新界區番工、平均最早都要六點幾先放得工既我，要係 7:45 前去到灣仔，仲要食埋晚飯，真係有 d 匪夷所思...

放工急急腳走，匆匆係 Oliver's 食個簡餐，就要趕去會展睇 show，好彩剛剛 7:45 去到會場，趕餐死，點知個 show 結果係 delay 到 8:15 先開場，早知慢慢食個 dinner 啦！

呢次係我第二次係會展睇 concert，size 同設施當然同香港體育館冇得比，不過紅館裝修休館，有排都冇得係紅館睇 show....

座位起碼都去到成三、四十行之後，距離個台都好遠下，不過好在都算係舞台中央，就正正係 Panel 後幾行既位置...

依家睇 show 唔少得既紀念品，包括打氣棒棒同螢光手帶.....

今次個 show 李克勤安排左好幾位嘉賓，包括關楚耀、鄧健泓、黃伊汶、黃家強...

雖然個 show 遲左開始，不過都唱到十點九、十左右，足足兩個半鐘頭。整體黎講，算係不過不失啦！

Pekkle 老翻手巾仔

無無聊聊又走去福榮街行下 d 批發鋪頭，睇下會唔會搵到 Pekkle 精品既漏網之魚.... 係差唔多行完成條街之後，真係比我意外地發現左呢條 Pekkle 手巾仔....

係我平時唔會行既批發店、再係一堆毛巾仔禮盒入面，比我搵到呢盒 Pekkle，仲要係最後一條添，睇黎我同 Pekkle 都好有緣喎...

雖然係老翻，不過以 $10 一盒既價錢黎講，都算叫做有交代啦！起碼無串錯 Pekkle 個名，同埋當左 DD Duck 係 Pekkle 先啦...

好開心無啦啦又有收穫喇！

DIY Pekkle 迷你扭計骰鎖匙扣

尋日係屋企見到有個迷你扭計骰鎖匙扣，係一間電腦公司既宣傳品，原本唸住冇乜用正想掉左佢之際，突然唸起雪藍既一篇 blog...

http://hk.myblog.yahoo.com/ahirunopekkle-vivianchan/article?mid=2558

雖然明知自己對美術冇乜概念，個人又笨手笨腳咁，對呢 d 細微既工作亦都冇乜天份，不過為左可以親手整一件 Pekkle 收藏品，膽粗粗都要試一次！

唔記得幫個〝原主〞留影添.... 唔好意思，最多係度鳴謝番某大電腦公司既 souvenir 啦！

整出黎既效果雖然冇雪藍果個咁靚，又唔識得玩襯色，仲有 D 貼紙比我黐到歪哂添....  不過呢件話哂都係我親手整既 Pekkle 手作仔，縱使有咩瑕疵，我都已經好滿足！

Pekkle 2008 年鬧鐘

今日去完朗豪坊睇戲，就過左去瓊華睇下 Pekkle NDS 筆同文件袋番左貨未，結果仍然係令人失望既.... 不過又比我意外地發現左有第二樣新貨番左，就係 Ellon 出既 2008 年鬧鐘，二話不說就即刻入貨....

如果係以前既我，其實未必會第一時間買入呢個鬧鐘，因為個 design 都幾平凡，仍然係用緊幾年前既造型，呢個好似跳水造型既 Pekkle 公仔，甚至係之前出既鬧鐘都已經用過，真係冇乜特別！不過基於識得越黎越多 Pekkle blog 友既關係，依家但凡見到 Pekkle 既蹤影，都已經開始有 d 失控 lu....

因為太過〝猴禽〞，所以係貨都冇驗過，甚至連有咩 functions 都唔知既情況下，就已經匆匆買左..... 番到屋企 check 鐘，先發現原來響鬧時係會有藍閃光既，都幾特別喎，算佢彌補到設計上既不足啦！

zoom 近 d 睇下藍閃光既效果，都幾犀利下嫁...

呢個鬧鐘，如果去專門店 Manis 買就要 $109，而瓊華亞叔就只係賣 $85，可惜我去時佢地已經賣哂....  唔想再等佢番貨先買既關係，我最終都係忍唔住，以 $89 既價錢去左隔離後生仔果間鋪買，雖然買貴左 $4，不過可以即時擁有，都算值得既！