Thursday, February 28, 2008

新城市廣場大變奏...

記得之前睇過一個財經電視節目,內容係講有關香港既地產市道,好記得當時節目講到香港租金升幅最高、租值最貴既商場,就係九龍塘既又一城同沙田既新城市廣場,當時尚未大肆翻新既新城市廣場能夠榜上有名,都真係令我有 d 意外...


近一年,新城市廣場不單只將商場翻新,引入左好多過往只會出現係港島區,或者係尖沙咀區既名店,如 Armani、Vivienne Westwood、agnes b.、CK、Godiva、Leonidas、City Super、Triple O's 等等、仲吸引到初次登陸香港既外地品牌紛紛係新城市設分店,如 NEXT、翡翠小廚等等....令到新城市廣場即時變左新界區既中、高檔消費熱點...


幾前日仲發現連 Cova 都就快係新城市開設佢地首間新界區既門市,呢間門市雖然只係 cake shop,唔係 cafe,唔會有名人係度 high tea,所以應該都冇乜機會碰到 d 上等人、大明星咁,不過都未嘗唔係一個驚喜,希望呢間門市會有 Cova 自家製既 gelato 賣啦!咁以後想放縱一下自己,扮一刻上等人都唔洗搭車、搭船咁去食 lu.....



如果遲 d 連 XTC 都係新城市廣場開埋分店就正囉!咁我食雪糕又可以再多一個選擇... 不過再係咁食法,到時相信以我既身型,都應該都夠哂資格參加〝重量級空手道賽〞,甚至可以被訓練成為摔角手添......


Tuesday, February 26, 2008

Pekkle 浴巾

係我記憶之中,冇見過 Sanrio 有出 Pekkle 既浴巾,反而手巾仔、面巾就出過好多唔同既款,希望唔係我錯過左啦.......


雖然正版我就未買過,甚至未見過添,不過老翻 Pekkle 浴巾我就用過喎,唔知一眾 Pekkle 既 fans 又有冇買過呢?


因為佢係老翻街邊貨,所以對毛巾既質素就唔好有咩期望,雖然係咁,不過 Pekkle 個樣做得超似,個 design 又靚,真係幾可亂真嫁!以我所知,佢先後只係出過呢兩款,兩款都一樣咁可愛嫁!



呢一款係第一款出既浴巾,都已經係三、四年前既事,記得當時係賣 $50 三條,係我係一個偉華中心擺短期租約既 kiosk 度買既,個 counter 將各款公仔浴巾掛得高高咁,我離遠見到 Pekkle 浴巾,已經第一時間飛身撲埋去買....  不過自從偉華中心裝修完,開左間百佳超級市場之後,呢 d 短期 counter 已經不復見.....


原本唸住出得 Pekkle 浴巾,一定會長買長有,所以當時我只買左其中兩條係 Pekkle,點知一路係咁等、係咁等,發覺唔單只再冇其他款既 Pekkle 浴巾出過,連呢款都再冇得賣,果時真係好後悔冇買哂三條都係 Pekkle....



過左一排,終於都比我見到第二款既 Pekkle 浴巾出爐,今次既售價依然係 $50 三條,我即時買左三條一樣款既... 依家我已經用剩最後呢條啦.... 亦唔打算用佢,會將呢兩條〝絕版〞既 Pekkle 浴巾儲起佢,以作留念.....



無論係正版定老翻都好,希望係不久既將來,Pekkle 既浴巾會再次面世啦!


Saturday, February 23, 2008

塞翁失馬...

今日去左一年都唔慌會去一次既葵涌廣場一趟,原意係想搵下 blog 友介紹既 Pekkle 全盒。轉左兩程車,幾經〝辛苦〞先到達葵涌廣場,可能過左新年太耐既關係,我由葵涌廣場既三樓,一直搵到去地下果層,都冇辦法搵到 blog 友買到既 Pekkle 全盒,而經過今次〝再遊〞葵涌廣場,亦發覺呢個場賣精品既店舖比之前少左,所以唔單只買唔到 Pekkle 既全盒,連少少精品都買唔到,懷著期待既心情黎,咁既結果,唔多唔少都有 d 失望既....


 


可能個天都比我對 Pekkle 既忠誠感動到,所以當我行新都會廣場時,竟然比我係大眾書店搵到 Pekkle 新出既水壺,其實都出左有幾個月,只不過我一路都嫌佢貴左 d,所以一路都未買。估唔到又比我係新都會既大眾搵到佢,由呢件貨一出到依家,我大大話話都行過六、七間商務同大眾,一路都只有 Sanrio 其他 characters 既款,就係搵唔到 Pekkle 呢款。點知今次無心插柳既情況下,反而比我搵到佢,依家大眾仲要做緊會員八折優惠,連個天都咁幫我,我又點可以辜負佢呢?所以我即時買左兩個番黎,一個儲、一個用...


 



 


越睇佢就越靚,設計得又好貼心,分別有一個茶隔同一個飲水格,真係好正呀~


 



 


原本去專門店 Manis 買就要 $39.9 一個,依家我只係須要 $30.4 就可以買到,真係又靚又抵!果然係塞翁失馬、焉知非福....


Sunday, February 17, 2008

台灣新興小吃 --- 薯塔

岩岩睇完 655 期既飲食男女,知道長洲有間新小食店,引入台灣流行小食 ---- 旋轉薯塔,我呢個典型既〝廢物收集箱〞 Junk Food 王,即刻就已經唸緊幾時入去長洲試下呢個〝小玩意〞....

估唔到,尋日去尖沙咀行街既時候,係 City Super 既 food court,就比我發現到呢個〝小玩意〞,不過就應該唔係飲食男女介紹既長洲〝洲啤工房〞,而係一間叫 Alien Potato Chips 既小賣 counter,根據雜誌上既介紹,長洲賣既薯塔有二十種口味,售價係 $12 一串,不過呢間 Alien 既口味就只得四款,至於售價,大家都應該估計到,擺得係 City Super 賣既,都唔會平得過長洲啦!係 $15 一串,同時買三串就 $40。不過慳番搭船入長洲既錢同時間,計落都仲有賺既...



因為佢果四種口味只得:農香蕃茄、南非椰香、韓式泡菜同原始風味〔即係海鹽味〕,頭兩種口味都唔係我杯茶,所以我只係買左後面兩種口味試...




試過之後,其實都不外如是,只係覺得幾得意,同埋食個〝啅頭〞囉,同普通薯片既口感冇乜大分別,而且因為薯片與薯片之間係相連住,所以食起上黎都相當狼狽,好彩我係坐係 food court 入面食完先離開,如果唔係一路行就會一路跌 d 薯片碎出黎,到時海港城既清潔工人,就真係多得我唔少咯.....